"Сочи 2014": Уран гулгалтын төрөлд дэлхийн шинэ амжилт тогтоолоо
Хэнийг нь түрүүлсэнд тооцох вэ
Сочигийн олимпийн эмэгтэйчүүдийн цанын чөлөөт үсрэлтийн тэмцээнд түүхэнд бичигдэхээр нэгэн үйл явдал болсон байна. Тэмцээнд өрсөлдөж байгаа Словенийн цаначин Тина Мазе болон Швейцарийн цаначин Доминик Гизин нар нар яг адилхан амжилт гаргасан аж.
Тэдний үсрэлтийн цаг нь нэг минут 41.57 секунд байжээ. Одоогоор хоёр тамирчны хэнд нь ялалт өгөхөө шийдээгүй байгаа учир урьдчилсан бүртгэлд тэднийг нэгдүгээр байрт шалгарсан гэж бичсэн гэнэ.
Харин хүрэл медалийн амжилт үзүүлсэн Швейцарийн цаначин хоёр тамирчнаас ердөө нэг секундыг зуу хуваасны 10-тай тэнцэх хугацаагаар хоцорчээ.
Олимпийн аварга болсныхоо дараа шийдвэрээсээ буцав
Норвегийн цаначин Майкен Касперсен Фалла өнгөрсөн мягмар гарагт цанын спринтийн төрөлд түрүүлж, алтан медалиар энгэрээ мялаасан. Харин дасгалжуулагчид Сочигийн олимпод ирэхээс өмнө түүнийг биатлоны төрөлд хүчээ сорих санал тавьж байсан талаар биатлонч Сюнневе Солемдаль ярьсан гэнэ.
Учир нь Норвегийн биатлоны шигшээ багаас цанын шигшээ амжилтаараа илүү байгаа аж. Майкен Касперсен Фалла “Хэрвээ Сочид амжилт гаргаж чадвал биатлоноор хичээллэж, 2016 онд Норвегид болох биатлоны ДАШТ-нд оролцоно” гэжээ. Гэвч цаначин Сочигийн олимпоос алтан медаль хүртсэнийхээ дараа биатлоноор хичээллэнэ гэдэгт итгэлтэй биш байгаа гэдгээ хэлсэн аж.
Олимпийн улмаас гэрийн даалгаврыг багасгах хүсэлт тавилаа
ОХУ-ын Төрийн Думын депутат Николай Булаев дунд сургуулийн багш нарт хандан ирэх долоо хоногуудад сурагчдын гэрийн даалгаврыг багасгах хүсэлт тавьсан гэнэ. Депутатын хэлснээр энэ нь хүүхдүүдэд Сочигийн олимпийн наадам үзэх арай илүү цаг гаргахад туслах аж. Төрийн Думын дарга С.Нарышкин Н.Булаевын санаачилгыг дэмжсэн байна. Түүнчлэн олимпийн уралдаан тэмцээн үзэх цаг гаргахын тулд армийн дайчдын цагийн хуваарийг өөрчилжээ. Зарим цэргийн ангийн дайчдад телевиз үзэх дөрвөн цаг нэмсэн аж.
Зочид соёлын хөтөлбөрийг их сонирхож байна
Сочигийн олимпийн үеэр зохион байгуулж байгаа урлаг, соёлын хөтөлбөрөөр эхний дөрвөн өдөрт л гэхэд олимпод оролцож буй улс орнуудын уран бүтээлчдийн хамтарсан 140 гаруй арга хэмжээг толилуулаад байгаа юм. 185 мянга орчим үзэгч тоглолтуудыг үзэж сонирхжээ.
Зочид болон тамирчид Оросын бүх нутгийн онцлогийг харуулсан дуу хөгжим, бүжгийн тоглолтод сэтгэл хангалуун байгаагаа илэрхийлж байгаа аж. Сочи хотод Оросын 70 бүс нутгаас очсон 5000 орчим дуучин, бүжигчин арван тайзанд тоглолтоо хийж байна. Өвлийн олимпийн үеэр зохиох урлаг, соёлын хөтөлбөрийн талаар Culture.sochi2014.com сайтаас сонирхож болно.
Энэхүү хөтөлбөрийн хүрээнд зохиож байгаа ихэнх тоглолт, үзэсгэлэн үнэгүй юм. Олимпийг угтаж 2010 оныг киноны, 2011-театрын, 2012-хөгжмийн, 2013-музейн жил болгон зарлаж, ОХУ даяар болсон олон тооны урлаг, соёлын тоглолтыг гурван сая гаруй хүн үзжээ.
Уран гулгалтын төрөлд дэлхийн шинэ амжилт тогтоолоо
ОХУ-ын уран гулгагч, дэлхийн аварга Татьяна Волосожар, Максим Траньков нар уран гулгалтын хосын богино үзүүлбэрийн төрөлд дэлхийн шинэ амжилт тогтоосон байна. Уран гулгагчид олимпийн дөрөв дэх өдөр Арам Хачатуряны “Багт наадам” вальсын аялгуунд үзүүлсэн үзүүлбэртээ 84.17 оноо авч, алтан медалийн эзэн болсон аж.
Тэд өнгөрсөн нэгдүгээр сард Европын АШТ-нд 83.98 оноо авч байсан амжилтаа эвджээ. Сочигийн олимпийн уран гулгалтын хосын богино үзүүлбэрийн төрөлд ОХУ-ын уран гулгагч Ксения Столбова, Федор Климов нар 79.64 оноогоор мөнгө, Германы уран гулгагч Алена Савченко, Робин Шолков нар 75.21 оноогоор хүрэл медаль хүртлээ.
Алтан медалиас үнэтэй мөрөөдөл
АНУ-ын шилдэг сноуборчдын нэг Жастин Райтер Сочигийн олимпод оролцохын тулд мөнгөө хэмнэж, сүүлийн нэг жил машиндаа амьдарчээ. Тэрбээр Ванкуверийн олимпод мөнгөгүйн улмаас оролцоогүй аж. Тиймээс энэ олимпод оролцохын тулд бэлтгэл сургуулилтын бааздаа хоноглож, сноубордын ДАШТ-нээс хүртсэн мөнгөн медалиа баазынхаа дээврийн хонгилд хадгалж байжээ. Жастин Райтер Сочигийн олимпод оролцох мөрөөдлөө биелүүлсэн бөгөөд орон гэргүй байгаадаа огт харамсдаггүй гэнэ.
Гэхдээ олимпийн алтан медаль түүнийг их мөнгөтэй болгохгүй юм. Учир нь АНУ Сочигоос алтан медаль хүртсэн тамирчдадаа 25 мянган ам.доллар амласан аж.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
