Б.Батцогт: Барилгын төсөвт өртгийн 13 хувь нь ажилчдын хөдөлмөр хамгаалалд зарцуулагдах ёстой

МҮЭХолбоо Барилгын ҮЭХолбоо хамтран хэвлэлийн бага хурал хийж УИХ, Засгийн газар, нийт ажил олгогч, ажилтнуудад хандан уриалга гаргалаа.

Сүүлийн жилүүдэд эдийн засаг тэлж бүтээн байгуулалтын ажлууд багагүй өрнөхтэй зэрэгцэн үйлдвэрлэлийн осол аваар буурахгүй байна. Хамгийн сүүлд нэг сарын дотор гурван удаагийн осолд нийт 6 хүний алтан амь нас эндэж тэдний гэр бүл, улс оронд хэмжиж болшгүй хохирол учирлаа. 

Шалтгааныг тодруулбал Хөдөлмөрийн аюулгүй ажиллагааны наад захын  хяналт, журам зааврыг мөрдөөгүй, зохих зөвшөөрөлгүй байгаа бөгөөд нэг үгээр хэлбэл санаатайгаар хүний амь насыг эрсдэлд учруулсан гэж үзэж болохоор байна.

Хөдөлмөрийн аюулгүй ажиллагааны наад захын  хяналт, журам зааврыг мөрдөөгүй, зохих зөвшөөрөлгүй байгаа бөгөөд нэг үгээр хэлбэл санаатайгаар хүний амь насыг эрсдэлд учруулсан гэж үзэж болохоор байна.

Энэхүү осол эндэгдлүүдээс гадна хүний эрүүл мэнд бие махбодид гэмтэл бэртэл учруулах, мэргэжлийн өвчин тусах, тахир дутуу болох зэрэг осол аваар гарч байна.

Манай улсын төр засаг, ажил олгогчид ажилтнуудын Хөдөлмөрийн аюулгүй байдал эрүүл ахуйн асуудалд хойрго ханддаг, хөрөнгө оруулалт хийдэггүй хэлбэр төдий ажлуудыг хийж ирсэний үнэн дүр төрх осол аваараар илэрч байна. 

Иймд МҮЭХолбоо Барилгын ҮЭХолбоо хамтран УИХ, Засгийн газар, нийт ажил олгогч, ажилтнуудад хандан дараах шаардлага уриалгыг хүргүүлж байна.

УИХ, Засгийн газарт

1. 2013 оны ХАБЭА талаар гаргасан 20 тогтоолын хэрэгжилтийг дүгнэж, хариуцлага тооцох
2. ХАБЭА тухай хуульд нэмэлт өөрчлөлтийг УИХ-ын намрын чуулганаар оруулах
3. Засгийн газарт ХАБЭА тухай хуульд заасны дагуу бараа бүтээгдэхүүн үйлчилгээний зардалд ХАБЭА зарцуулах хөрөнгийг улсын төсөвт тусгах
4. Барилгын төсөвт өртөгт эзлэх нийт төсвийн 13,6 хувийг ХАБЭА зохих журмын дагуу зарцуулж буй эсэхэд хяналт тавих
5. Хөдөлмөр хамгаалал эрүүл ахуйн Үндэсний хөтөлбөрийг санхүүгийн тодорхой эх үүсвэртэйгээр батлах

Ажил олгогч нарт:

1. Хуулийн дагуу нийт үйл ажиллагааны зардлын 1 ээс дээш хувийг ажилтнуудынхаа ХАБЭА асуудалд төсөвлөн зарцуулж хэвших
2. Барилгын туслан гүйцэтгэгч гэрээгээр ажиллагсдыг ХАБЭА стандарт шаардлагыг хангасан эсэхэд хатуу хяналт тавьж ажиллуулах, Хөдөлмөр хамгааллын зардлыг гэрээнд нарийн тусгаж хэрэгжилтийг ханган ажиллах
3. ХАБЭА сургалт, зөвлөгөөн хийх, эрсдэлээс урьдчилан сэргийлэх арга хэмжээг тогтмол хийж хэвших, зан үйлд сургах
4. Нийт компаниуд ялангуяа Барилгын салбарын ажил олгогч нарыг аюулгүй Ажлын байрны төлөө манлайлж ЗГ, ҮЭ-тэй хамтын ажиллагаагаа өргөжүүлэх

Ажилтнуудад:

1. ХАБЭА талаарх мэдлэг боловсролоо дээшлүүлэх, наад захын аюулгүй байдлаа хангаж хэвших
2. Аюултай, эрсдэл өндөртэй ажлын байранд ажиллахгүй байх, ажил олгогч болон асуудал хариуцсан ажилтнуудад шаардлага тавих
3. Осол аваар гарах нөхцөл бүрдсэн тохиолдолд холбогдох төрийн байгууллагуудад мэдээлэх
4. Цаг ямагт осол аваараас урьдчилан сэргийлэх

Хэвлэлийн хурлын үеэр Монголын Барилгын ҮЭХ-ны дарга Б.Батцогт "Барилгын төсөвт өртөгийн 13 хувь нь ажилчдын хөдөлмөр хамгаалалд зарцуулагдах ёстой байдаг. Гэтэл барилгын компаниуд зардлаа хэмнэхдээ хөдөлмөр хамгааллын зардлаас танаад байгаа. Үүнээс болоод ажилчид хохирсоор байна” хэмээн ярилаа.