"Парис 2024" зуны олимпын наадамд Монголын баг есөн спортын төрөлд 32 тамирчинтай өрсөлдөх билээ. 

Ikon.mn сайт олимпод оролцох Монголын тамирчдын мэдээлэл, цагийн хуваарийг багтаасан ТУСГАЙ хуудсаа нээж байна. 

Энэ удаагийн олимпод Монголоос эрэгтэй 15, эмэгтэй 18 тамирчин өрсөлдөнө. Өмнөх олимпоос медаль хүртсэн нэг ч тамирчин багтаагүй бол Дэлхийн Аварга Шалгаруулах Тэмцээн (ДАШТ)-ээс алтан медаль хүртсэн гурван тамирчин багтжээ.

Манай тамирчдаас хамгийн ахмад нь марафонч Б.Сэр-Од ирэх аравдугаар сард 43 нас хүрнэ. Харин хамгийн залуу нь жүдоч О.Хүслэн 19 настай.

Байт харваач Б.Отгонболд энэ сарын 25-нд чансаа тогтоох харваагаар "нээлт" хийх бол наймдугаар сарын 11-нд эмэгтэй марафончдын тэмцээнээр өндөрлөх аж.

Олимпын наадам албан ёсоор энэ сарын 26-нд эхлээд наймдугаар сарын 12-нд дуусна.

Монголын баг тамирчид олимпоос 30 медаль хүртсэн. Төрлүүдээр нь авч үзвэл жүдод хамгийн олон буюу 11 медаль (нэг алт, дөрвөн мөнгө, зургаан хүрэл) хүртсэн бол чөлөөт бөхөөр 10, боксоор долоо, буудлагаар хоёр медаль зүүжээ. Найдангийн Түвшинбаяр, Энхбатын Бадар-Ууган нар 2008 оны Бээжингийн олимпоос алтан медаль хүртэж байв. 

Олимпод оролцож буй Монголын багийн дундаж нас 26 жил, найман сар, 19 өдөр юм. Манай тамирчдаас хамгийн ахмад нь марафонч Б.Сэр-Од ирэх аравдугаар сард 43 нас хүрнэ. Харин хамгийн залуу нь жүдоч О.Хүслэн 19 настай.

"Алдар" спорт хорооноос 14 тамирчин олимпод оролцохоор болсон нь тэргүүлэх үзүүлэлт. Тэдний араас "Хилчин"-гийн тав, "Хүч" спорт хорооны харьяалалтай дөрвөн тамирчин Парисыг зорих юм.

Аймгуудаар нь авч үзвэл Улаанбаатар хотын харьяалалтай 14 тамирчин бий. Архангай, Баянхонгор, Өвөрхангай, Завхан, Сэлэнгэ, Сүхбаатараас тус бүр хоёр, Хөвсгөл, Ховд, Дорнод, Говь-Алтай, Хэнтий аймгаас тус бүр нэг тамирчин багтжээ.

Монголын багийн тугчаар сонгогдсон марафонч Б.Сэр-Од олимпод хамгийн олон буюу зургаа дахиа оролцох бол "Лондон 2012"-т цэц мэргэнээ сорьж явсан Н.Баяраа 12 жилийн дараа дахин олимпод өрсөлдөх юм.

Түүнчлэн Риогийн олимпод хүч үзсэн хүндийг өргөгч М.Анхцэцэг, марафонч Б.Мөнхзаяа, П.Орхон нар багтсан бол Токиогийн олимпод туршлага хуримтлуулсан найман тамирчин байна.