СХД-ийн 25 дугаар хорооны 170 дугаар цэцэрлэгээс төв зам хүртэлх хатуу хучилттай замыг энэ сарын 20-нд ашиглалтад оруулна
Нийслэлийн Сонгинохайрхан дүүргийн 25 дугаар хороо, 170 дугаар цэцэрлэгээс төв зам хүртэлх хатуу хучилттай 0.6 км авто замын ажлын явц 80 хувийн гүйцэтгэлтэй үргэлжилж байна.
Иргэдийн эрүүл аюулгүй тав тухтай орчинд амьдруулах түгжрэлийг бууруулах зорилгоор гэр хороолол руу түлхүү автозам тавихаар төлөвлөн гэр хорооллын доторх холбоос шинэ авто зам барих ажлуудыг эхлүүлэн гүйцэтгэж байгаагийн нэг нь тус авто зам юм.
Өнөөдрийн байдлаар зам барилгын ажлын гэрэлтүүлэг, газар шороо, авто замын хашлага суурилуулалтын ажлууд бүрэн дуусаж, асфальтбетон хучилт хийхээр бэлтгэлийг хангаж байна. Мөн явган хүний замын трассд өртсөн 10 нэгж талбарын газар чөлөөлөлтийн ажлууд үргэлжилж байгаа юм.
Тус авто замыг 2020 оны 6 дугаар сарын 20-ны өдөр байнгын ашиглалтад оруулахаар төлөвлөн ажиллаж байна гэж Нийслэлийн авто замын хөгжлийн газраас мэдээллээ.
