Нийслэл болон аймгийн сургууль, цэцэрлэгийн багшийн сул орон тооны мэдээлэл

Гэрэл зургийг MPA агентлагийн онцгой зөвшөөрөлтэйгөөр ашиглав

Нийслэл болон хөдөө орон нутаг дахь цэцэрлэг, сургуулийн багшийн сул орон тооны талаар мэдээллийг Боловсролын ерөнхий газраас мэдээллээ. 

Ерөнхий боловсролын сургуулиудад нийт 3,324 багшийн сул орон тоо үүсээд байгаа ба үүнээс 1,590 нь нийслэлд байна. Харин сургуулийн өмнөх боловсролд 1,147 багш, ажилтны сул орон тоо үүсээд байгаа ба үүнээс 685 нь нийслэлд байна. 

Бага, дунд боловсролын салбарын албан ёсны статистик маягтын /БДБ-19/ дагуу жил бүрийн 7 дугаар сард тухайн хичээлийн жилд ЕБС-д шаардлагатай багшийн мэдээллийг нэгтгэн гаргадаг аж. 

 

Сургуулийн өмнөх боловсролын салбарын шаардлагатай багш, ажилтны мэдээллийг 2025 оны 07 дугаар сарын судалгаанд үндэслэн гаргасан байна. 

 

Мөн 2024-2025 оны хичээлийн жилд багш хөтөлбөрөөр бакалаврын зэрэгтэй 2,877 оюутан төгсөж, багшлах эрхийн сургалтад 163 иргэн хамрагдаж багш мэргэжил эзэмшин хөдөлмөрийн зах зээл дээр гарчээ. 

 

Багшийн сул орон тоог нөхөх хүрээнд:

• Багш мэргэжлээр шинээр төгсөж буй иргэдэд сул ажлын байрны мэдээллийг нээлттэй хүргэх;
• Орон нутагт ажиллах багшлах боловсон хүчнийг тогтвор суурьшилтай ажиллах нөхцөл боломжоор хангахад орон нутгийн өөрөө удирдах болон захиргааны байгууллагууд хамтран ажиллах;
• Дээд боловсролтой иргэдийг эзэмшсэн мэргэжлийнх нь чиглэлээр багшлах эрхийн богино хугацааны болон хөрвөх сургалтуудад үе шаттай хамруулах;
• Өөр салбарт ажиллаж байгаа болон хүүхэд асрах чөлөөтэй байгаа багш мэргэжилтэй иргэнийг гэрээгээр болон цагийн багшаар ажиллуулах боломжийг олгох;
• Багш хөтөлбөрөөр суралцаж буй 3, 4 дүгээр курсийн оюутнуудыг мэргэжлийнх нь чиглэлээр цалинтай дадлага хийлгэх, тухайн их, дээд сургуулиудтай хамтран ажиллах;
• Өндөр насны тэтгэвэр тогтоолгосон багш нарыг хүсэлтийнх дагуу сул болон дутагдалтай багшийн орон тоонд ажиллуулах;
• Удирдах ажилтнууд өөрийн мэргэжлийн чиглэлийн хүрээнд цагаар хичээл заах... гэх мэтээр тухайн цэцэрлэг, ерөнхий боловсролын сургууль, орон нутгийн боловсролын байгууллагууд өөр өөрсдийн тохируулан ажиллаж байна.