"Ирэх долоо хоногт шинэ Эрүүл мэндийн сайдын асуудлыг УИХ-д оруулж ирнэ"
Улаанбурханы өвчлөлийн талаар Шадар сайд УИХ-ын чуулганд мэдээлэл танилцууллаа.
Дараа нь гишүүд асуулт асууж, ЭМСЯ-ны ТНБД С.Ламбаа болон Ерөнхий сайд гишүүдийн асуултад хариулж байна.
Хамгийн эхэнд Ж.Батзандан гишүүн Ерөнхий сайдаас асуулт асуулаа.
- Засгийн газрын нөөц хөрөнгөөс хэдий хэмжээний хөрөнгө гаргаж байгаа вэ, ЭМСЯ яагаад эзэнгүй хэвээр байна вэ?
- Энэ асуудал өнөөдөр гэнэт бий болчихсон асуудал биш. Сүүлийн 2, 3 сарын хугацаанд эрүүл мэндийн салбарыг ТНБД удирдаад, Шадар сайд сайдыг нь орлон гүйцэтгээд явж байгаа.
Энэ асуудал хоёр сарын өмнөөс Засгийн газрын хуралдаанаар орж ирж, бид хэрэгтэй бүх мөнгийг нь гаргаж өгсөн. Тухайн үед Засгийн газрын гишүүд хол хорио тогтоох талаар салбарын мэргэжилтнүүдэд хандаж байсан ч мэргэжлийн хүмүүс "ДЭМБ-аас хөл хорио тогтоож Улаанбурхантай тэмцэх нь үр дүнтэй арга гэж үздэггүй гэж зөвлөдөг.
Хоёрдугаарт, энэ өвчний нууц үе нь 21-хоногоос доошгүй үргэлжилдэг. Тиймээс урт хугацааны буюу нэг, хоёр сараар хөл хорио тогтоох нь энэ өвчний тархалтаас хамгаалдаг шалгарсан арга биш. Үр дүнгээ ч өгдөггүй. Тиймээс хөл хорио тогтоогоод ямар ч шаардлагагүй. Харин вакцин хийх хэрэгтэй" гэсэн.
Бид вакцинтай холбоотой 960,000 сая төгрөгийн асуудлыг шийдсэн. Бусад зардалуудыг нь шийдэж байна.
Яагаад гэнэт өнөөдөр энэ асуудал ингэж хүчээ авсан бэ гэвэл, 0-5 насны хүүхдүүдийн эндэгдэлийн багц тоог нь 0-1 нас гээд дотор нь орчихсон байгааг нэмээд хоёр дахин их болгоод бодсоноос болсон. Тэгээд л баахан шуураад эхэлсэн. Энэ тоо их бага байх нь чухал биш. Нэг хүүхэд эндсэн ч хүмүүсийн үхэл зовлонгоор юм яриад хэрэггүй.
Гэхдээ бодит байдлыг гуйвуулж, зохион байгуулалттайгаар сошиалаар шуугиад байгаа нь буруу юм.
Тийм ч учраас өнөөдөр Ерөнхийлөгч, УИХ дарга дээр орж бодит байдлыг танилцуулсан. Мөн Тагнуулын Ерөнхий Газрын даргыг дуудаж, зохион байгуулалттайгаар нийгмийг эмх замбараагүй болгон, түгшээсэн асуудлыг аль аккаунт, хэн зохион байгуулалттайгаар эхлүүлсэн бэ гэдгийг шугам шугамаар нь шалгах үүрэг өгсөн.
Хүүхдийн эндэгдэл огцом өсөөгүй нь түрүүн Шадар сайдын мэдээлэл дээр гарлаа. Хүүхдийн эндэгдэл олон жилийн дундаж дээрээ байгаа. Үүн дээр Улаанбурханаар эндсэн 59 хүүхэд нэмэгдээд байна.
Түүнчлэн эрүүл мэндийн салбар эзэнгүйдсэн нэг цаг минут ч байхгүй. Улсын онцгой комиссыг ахалдаг Шадар сайд өөрөө Эрүүл мэндийн сайдын үүргийг хавсарч гүйцэтгээд явж байгаа. Энэ салбарын сайдаар дөрвөн жил ажиллаж байсан С.Ламбаа гуай өнөөдөр ТНБД-аар ажиллаад явж байна.
Бид УИХ-д олонх бүрдүүлж чадаагүй учраас Нам эвслүүдийн нийлбэрээр Засгийн газрыг бүрдүүлдэг. Ерөнхий сайдын хувьд би ирэх долоо хоногт шинэ Эрүүл мэндийн сайдын асуудлыг УИХ-д оруулж ирнэ" гэлээ.
