Жо Байден, Дональд Трамп нар Цагаан ордонд уулзана

АНУ-ын ерөнхийлөгч Жо Байден энэ долоо хоногийн Лхагва гарагт Цагаан ордонд ерөнхийлөгчийн сонгуульд ялсан Дональд Трампыг хүлээн авч уулзахаар болжээ.

2020 оны ялагдлаа хүлээн зөвшөөрөөгүй байгаа Трампын хувьд саяын сонгуулиар томоохон ялалт байгуулж, хоёр дахь удаагаа Цагаан ордонд суух болзлоо хангаад байгаа.

Өмнөх болон шинэ ерөнхийлөгч нар ингэж уулздаг уламжлал байдаг.

Гэхдээ Трампын хувьд 2020 оны сонгуулийн дараа шинээр сонгогдсон Байденыг хүлээн авч уулзалгүй, уг уламжлалыг эвдсэн юм.

Бас Трамп 2021 оны нэгдүгээр сарын 20-ны өдөр болсон Жо Байдены тангараг өргөх ёслолд оролцоогүй.

Байдены хувьд өөрийн өмнөх ерөнхийлөгчдөө ажлаа хүлээлгэж өгсөн АНУ-ын түүхэнд хоёр дахь ерөнхийлөгч болох гэж байна.

19 дүгээр зуунд ерөнхийлөгч Бенжамин Харрисон ажлаа өөрийн өмнөх ерөнхийлөгч Грүвер Кливлэндэд хүлээлгэн өгсөн нь цорын ганц ийм тохиолдол байсан юм.

Ардчилсан Намынхан одоо Камала Харрисын ялагдлын буруутныг хайцгааж байгаа ба Байден ихэнх бурууг үүрэх магадлалтай байна.

АНУ-ын төлөөлөгчдийн танхимын спикер асан Нэнси Пелоси саяхан хэвлэлд ярихдаа Байден хэтэрхий оройтож нэрээ татсан нь Харрист боломж олгоогүй тухай ярьжээ.

81 настай Байден хоёр дахь удаагаа ерөнхийлөгчөөр ажиллахад эрүүл мэндийн байдал нь сөргөөр нөлөөлж болзошгүй үндэслэлээр долдугаар сард нэрээ татаж, орондоо Камала Харрисын нэрийг дэвшүүлж байсан юм.

“Ерөнхийлөгч Камала Харрисыг шууд дэмжсэн нь нам доторх сунгааг явуулах бараг боломжгүй болгосон. Хэрвээ эрт эхэлсэн бол нөхцөл байдал өөр байх байлаа” гэж Пелоси ярьжээ.

Ардчилсан Намынхан ялагдлын буруутныг хайж байх хооронд Дональд Трамп шинэ засгийн газрын бүрэлдэхүүнээ тодруулж эхлээд байна.

Тэрбээр сонгуулийн кампанит ажлын менежэрээр нь ажилласан Сюзи Уайлсыг хамгийн түрүүнд Цагаан ордны тамгын газрын даргаар томилжээ.

Уайлс нь уг албан тушаалд томилогдсон анхны эмэгтэй болж байна.

Нэг үе вакцины эсрэг хөдөлгөөний том зүтгэлтэн байсан Роберт Кеннеди өнгөрсөн сонгуульд бие даан нэр дэвшиж байгаад наймдугаар сард нэрээ татсан юм. Ингэхдээ тэр Трампыг дэмжихээ илэрхийлсэн бөгөөд Трамп хариуд нь түүнийг шинэ засаг захиргааны эрүүл мэндийн салбарт ажиллуулахаа амлаж байв.

Лхагва гарагт NBC News сувагт ярихдаа ерөнхийлөгч агсан Кеннедийн зээ “Би хэний ч вакциныг булаах бодолгүй байна” гэж хэлсэн нь Трампыг амлалтаа биелүүлэхийг хүлээж байгаагаа илэрхийлсэн хэрэг байлаа.

Дэлхийн хамгийн баян хүн Илон Маск бас Трампын засаг захиргаанд ажиллаж магадгүй байгаа. Трамп түүнийг засгийн газрын үйл ажиллагааны оновчтой, үр ашигтай байдлыг хариуцдаг шинэ агентлагийн тэргүүнээр томилохоо сонгуулийн үеэр амлаж байжээ.

Эх сурвалж: AFP