Франц улс Амазоны ширэнгэ ойд өндөржүүлсэн харуул хамгаалалттай шорон байгуулна

Франц улс далайн чанад дахь өөрийн нутаг дэвсгэр болох Францын Гайанад хар тамхины наймаачид, радикал исламистуудыг хорих өндөржүүлсэн харуул хамгаалалттай шорон байгуулахаар болсныг тус улсын хууль зүйн сайд мэдээлжээ.

Нийт 400 сая еврогийн өртгөөр босох, 500 хүртэл хүн хорих багтаамжтай шорон 2028 онд ашиглалтад орохыг хууль зүйн сайд Жеральд Дарманен саяхан тус бүс нутагт зочилсныхоо дараа хэвлэлд ярьсан байна.

Сүүлийн саруудад Францын шоронгуудад гэмт хэрэгтнүүд гаднаас халдах оролдлого хэд хэдэн удаа гарсан нь ийм арга хэмжээ авахад хүргэсэн бололтой.

Францын Гайана бол Өмнөд Америк тивийн зүүн хойд эрэгт оршдог бүс нутаг юм.

Энэ бүс нутгийн оршин суугчид Францын сонгуульд санал өгөх, нийгмийн хамгааллын системд хамрагдах зэрэг эрхтэй байдаг.

Францын үндсэн нутаг дэвсгэрээс алслагдсан байрлал нь аюултай гэмт хэрэгтнүүдийг гадаад ертөнцтэй харилцахаас сэргийлэхэд чухал болохыг Дарманен тайлбарлажээ.

Одоо Францын шоронгуудад гаднаас гар утас нэвтрүүлэх замаар онц аюултай гэмт хэрэгтнүүд хоригдож байхдаа ч үйл ажиллагаа явуулах боломжтой байгаа юм.

Шинэ шоронгийн шав тавигдсан Францын Гайанагийн Сэнт-Лоран-ду-Марони хэмээх газар нь 1852-1954 онуудад нийт 70,000 хоригдлыг илгээж байсан алдарт Чөтгөрийн Арлын шорон байсан газар ажээ.

Энэ шоронгийн талаар Францын зохиолч Анри Шарьерын “Папиллон” номд өгүүлдэг бөгөөд хожим Стив Маккүин, Дастин Хофман нарын тоглосон Холливүүдийн кино болж байсан юм.

Эх сурвалж: BBC