Г.Баярцэцэг: Хэсэг хүн дур мэдэн чөлөөлсөн талбай дээр ТҮЦ дахин байршуулаад байгаа. Эдгээрийг ачна
Нийслэл хотын нийтийн эзэмшлийн зам талбайд дээр байгаа ТҮЦ-үүдийг өнгөрсөн сард нүүлгэн шилжүүлэх ажил өрнөж эхэлсэн.
Гэвч шинэ ТҮЦ-үүдийг нийтийн эзэмшлийн гудамж, талбайд дахин байршуулсан тохиолдол өнгөрсөн долоо хоногийн амралтын өдрүүдэд гарчээ. Тодруулбал энэ сарын 18-19-нд шилжих шөнө Сүхбаатар дүүргийн 8 дугаар хороо, МУИС-ийн автобусны буудлын урд талд зөвшөөрөлгүй ТҮЦ байрлуулжээ.
Энэ тухай НЗДТГ-ын ХМОНХХ-ийн дарга Г.Баярцэцэгээс тодруулахад "Хэсэг хүн дур мэдэн чөлөөлсөн талбай дээр ТҮЦ байршуулаад байгаа. Эдгээрийг ачна. Чөлөөлсөн талбайд дахиж нэг ч ТҮЦ байршуулахгүй" гэв.
Нийслэлийн төвийн зургаан дүүрэгт 1,700 гаруй ТҮЦ зөвшөөрөлгүй үйл ажиллагаа явуулж байснаас нэг сар гаруйн хугацаанд 1,300-г нүүлгэж, зам талбайг чөлөөлжээ. Үлдсэн 400 гаруй ТҮЦ-ийг нүүлгэх ажлыг үе шаттай хийх юм гэдгийг тэрбээр хэллээ.
ТҮЦ ажиллуулж байсан иргэдэд нийслэлийн зүгээс ажлын байр санал болгож байгаа ч тэд эсэргүүцэж буй.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
