"Бор болон цагаан ТҮЦ-үүд чинь бүгд Нийслэлийн шийдвэр шүү дээ. Одоо шилэн ТҮЦ оруулаад ирчихсэн байна"
Монголын худалдаачдын холбооноос өнөөдөр ТҮЦ эрхлэгчдийн нэгдсэн холбоотой хамтран мэдээлэл хийлээ.
Нийслэлээс ТҮЦ-үүдийг зөвшөөрөлгүй ачиж, эвдэж, дотор нь буй бараа бүтээгдэхүүнийг нь хог болгож, хувийн өмчид халдаж байгаа зэрэг маш олон хүний эрхийн ноцтой зөрчлүүд үүсэж байгаа учир тус холбооноос Хүний эрхийн комисст шаардлага хүргүүлэхээр болсон байна.
ТҮЦ эрхлэгчид "Иргэдийн ажлын байрыг хоморголон устгаж байна. Худалдааны салбарт ажил хөдөлмөр эрхэлснийхээ төлөө ялгаварлан гадуурхагдаж байна. Банк санхүүгийн дарамтад орж амиа хорлох дээрээ тулсан маш олон хүн байна" гэдгийг онцлов.
Тухайлбал 250 гаруй ТҮЦ эрхлэгчдээс судалгаа авахад банк, банк бус, ломбард, өдрийн зээл, барааны өр зэрэг нь нийлээд ₮30 гаруй тэрбум болж байгаа юм байна. Өмнө нь хэвийн төлөгдөөд явж байсан зээлийг төр таслан зогсоочихлоо. Энэ өрийг хэн хариуцах вэ. Өмнө нь яагаад энэ бодит судалгааг хийгээгүй юм бэ? гэв.
"2017 онд зөвшөөрөлгүй, 2020 онд татваргүй болгосон шүү дээ. Эдгээр шийдвэрүүдээс өмнө нь төлөөд л явж байсан"
ТҮЦ эрхлэгчдийн нэгдсэн холбооны удирдах зөвлөлийн гишүүн н.Уранчимэг "Бид эргэн тойрныхоо аж ахуйн нэгж байгууллагатай гэрээ хийж, тэдгээрээсээ усаа аваад орчин тойрныхоо цэвэрлэгээг хийдэг юм. Халдваргүйжилтийн байгууллага долоо хоног тутамд ирээд 10,000₮-өөр халдваргүйжүүлэлт хийдэг юм. Улаанбаатар цахилгаан түгээх сүлжээтэй гэрээ хийгээд тогоо авдаг юм. Хог тээврээ төлдөг юм. 2017 оноос хойш зөвшөөрөлгүй ажиллаж болох ажил үйлчилгээнд ТҮЦ орчихсон байдаг. 2020 оноос хойш Д.Сумьяабазар дарга татвар төлөх шаардлагагүй болгочихсон. Газрын төлбөрийг бас авахаа больчихсон. Эдгээр шийдвэрүүдээс өмнө нь бид эдгээрийг төлөөд явж байсан баримтууд нь байгаа.
ТҮЦ гэдэг чинь Нийслэлийн үе үеийн засаг дарга нараас үүдэж гарч ирсэн шүү дээ. 2015 онд Нийслэлийн гуравласан үйлчилгээний гэрээгээр бор ТҮЦ-ийг авч байсан. 2019 онд смарт цагаан ТҮЦ гарч мөн л нийслэлээс худалдаж авч байсан. Одоо шилэн ТҮЦ-үүд оруулж ирж байна. Шилэн ТҮЦ дээр бид цэвэрлэгээг нь хийе. Татвар төлье гэж гуйсан ч болохгүй байна. Юу ч мэдэхгүй хүмүүс хараагүй, ойлгохгүй байж харлуулж байна" гэв.
ТҮЦ эрхлэгчдийн нэгдсэн холбооноос Монгол Улсын ерөнхийлөгч, ерөнхий сайд, хотын дарга нарт дараах шаардлагыг хүргүүлж байгаа юм байна.
- ТҮЦ эрхлэгч нарт хүнлэг бус, харгис хэрцгий хандаж буй Үндсэн хууль зөрчсөн балмад үйлдлээ нэн даруй таслан зогсоохыг шаардаж байна.
- Захиргааны тухай хуулийг зөрчсөн 2025 оны хоёрдугаар сарын 14-ны өдрийн А230 тоот захирамж түүнийг хэрэгжүүлэхдээ холбогдуулан гаргасан дүүргийн засаг дарга нарын захирамжуудыг нэн даруй хүчингүй болгож хуулийг чанд сахин биелүүлж ажиллахыг шаардаж байна.
- Та бүхнийг Үндсэн хуулийн 2-р бүлэг 19-р зүйлээр иргэнийхээ өмнө хүлээсэн үүргээ биелүүлж, ТҮЦ эрхлэгчдийн эдийн засаг, нийгэм, хууль зүйн бусад баталгааг хангаж өгөхийг шаардаж байна.
- Бидний эрхэлж буй хөдөлмөрөөр нь ялгаварлан гадуурхаж нийгэмд нэр төр, алдар хүндийг гутаах гүтгэлэг, доромжлол тараах явдлаа таслан зогсоохыг шаардаж байна. Биднийг хүлээн авч үүссэн нөхцөл байдлыг хуулийн хүрээнд зохицуулах, уулзалт зохион байгуулахыг шаардаж байна.
Энэхүү шаардлагын хариуг 2025 оны дөрөвдүгээр сарын 30-ны өдөр авах ба хариу аваагүй тохиолдолд тэмцлийн дараагийн хэлбэрт шилжинэ гэдгээ анхааруулав.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
