Жо Байдены оношлогдсон түрүү булчирхайн хорт хавдрыг эрт илрүүлэхэд хэрэг болох зургаан шинж тэмдэг

АНУ-ын ерөнхийлөгч асан Жо Байден түрүү булчирхайн хорт хавдартай болсон нь өнгөрсөн долоо хоногийн Баасан гарагт авсан шинжилгээгээр оношлогдоод байна.

Түүний онош нэлээд хожуу шатандаа буюу хавдар биеийн бусад хэсэгт тархсаны дараа тогтоогдсон юм.

Түрүү булчирхайн хорт хавдар нь нас баралтын тоогоор АНУ-д уушгины хорт хавдрын дараа хоёрт ордог ажээ.

Гэхдээ эрт илрүүлсэн тохиолдолд эмчлэх бүрэн боломжтойг эмч мэргэжилтнүүд баталж байна.

Түрүү булчирхайн хорт хавдрын хувьд илүү тодорхой шинж тэмдгүүд хожуу шатанд илэрдэг нь үхэлд хүргэх гол шалтгаан болдог ажээ.

Тиймээс шээх үед илэрдэг зарим өөрчлөлтүүдийг аль болох эрт анзаарч, шинжлүүлэх шаардлагатайг зөвлөж байна.

Тухайлбал дараах зургаан шинж тэмдэг хавдрын эрт үед ажиглагдаж эхэлдэг гэнэ.

• Шээс гарч эхлэхэд, эсвэл давсгийг бүрэн суллахад хүндрэлтэй байх
• Шээсний гаралт сул байх
• Шээсний дараа давсаг хоосроогүй мэт мэдрэмж төрөх
• Шээж дууссаны дараа дуслах
• Ердийн үеэс илүү олон удаа шээдэг болох, ялангуяа шөнийн цагаар
• Шээс гэнэт хүрэх, эсвэл жорлон орохоос өмнө шээс дуслах

Дээрх өөрчлөлтүүд нь хорт хавдрын биш нийтлэг өвчлөл болох түрүү булчирхайн томролтой бас холбоотой байх боломжтой гэнэ.

Хэрвээ хорт хавдар хүндэрч, биеийн бусад хэсэгт тархсан бол дараах шинж тэмдгүүд нэмж ажиглагддаг байна.

• Нуруу, ташаа, аарцаг орчмоор өвдөх
• Бэлэг эрхтний хөвчрөлд асуудал үүсэх
• Шээс болон үрийн шингэнд цус ажиглагдах
• Шалтгаангүй жин хасах
• Хавдар нуруу нугасыг дарсны улмаас хөл сулрах, мэдээ алдах, давсаг, хэвлийн хяналт алдагдах

Америкийн Хорт Хавдрын Нийгэмлэгийн мэдээлснээр эрэгтэйчүүдийн түрүү булчирхайн хорт хавдраар оношлогдох дундаж нас 67 байдаг ажээ.

Жо Байдены хувьд энэ жил 82 настай юм. Америкийн Хорт Хавдрын Нийгэмлэг эрэгтэйчүүдэд 50 наснаас эхлэн урьдчилсан сэргийлэх шинжилгээ өгч эхлэхийг зөвлөдөг ажээ.

Эх сурвалж: Business Insider