ЖАГСААЛТ: "ЖДҮ 888" төслөөс зээл авсан улс төрийн өндөр албан тушаал хашиж байсан хүмүүсийн хамаарал бүхий компаниуд
Хөгжлийн Банкны өнөөдрийн сонсголын үеэр ЖДҮ 888 төслийн хүрээнд арилжааны банкнуудаар дамжуулан олгосон зээлийн багцуудыг танилцууллаа.
Хоёр тэрбум төгрөгөөс дээш, доош дүнтэй хэмээн авсан зээлүүдийг багцлан харуулсан юм. Тэгвэл экспортыг дэмжих, импортыг орлох ЖДҮ 888 төслийн хүрээнд зээл авсан улс төрийн өндөр албан тушаалтнуудын хамаарал бүхий компаниуд болон зээлийн зарцуулалтын талаар шинжээчийн танилцуулсан дүгнэлтийг хүргэе.
1. "Монос групп" ХХК хамаарал бүхий зургаан компаниар дамжуулан 18.3 тэрбум төгрөгийн зээлийг Хөгжлийн Банкнаас арилжааны банкаар дамжуулан авчээ.
Тус компанийн 100 хувийн хувьцааг УИХ-ын гишүүн асан Л.Эрдэнэчимэгийн төрсөн ах Л.Хүрэлбаатар эзэмшдэг аж.
Зээл авсан хамаарал бүхий зургаан компани:
- "Монос групп" ХХК "Ургамалын гаралтай эрүүл мэндийн ундааны үйлдвэр" төсөл хэрэгжүүлэхээр 5.9 тэрбум төгрөг
- "Энхийн шүүдэр" ХХК "Дуслын шингэний үйлдвэр байгуулах төсөл" хэрэгжүүлэхээр 5.8 тэрбум төгрөг
- "Мөнхийн тун" ХХК "Эм үйлдвэрлэл, эм эмнэлгийн хэрэгслийн импорт худалдаа" төсөл хэрэгжүүлэхээр 2.2 тэрбум төгрөг
- "Монос косметик" ХХК "Гоо сайхны үйлдвэрлэлийг өргөжүүлэх төсөл" хэрэгжүүлэхээр 1.8 тэрбум төгрөг
- "Цомбо" ХХК "Тун шилтэй тарилгын эмийн үйлдвэрийн өргөтгөлийн төсөл" хэрэгжүүлэхээр 1.8 тэрбум төгрөг
- "Мөнхийн тун" ХХК "Эмнэлгийн нэг удаагийн хэрэгсэл үйлдвэрийн төсөл" хэрэгжүүлэхээр 600 сая төгрөгийн зээлийг авсан байна.
2. "Бишрэлт" групп нийт 59 тэрбум төгрөгийн зээлийг Хөгжлийн Банкнаас шууд болон арилжааны банкнаар дамжуулан авсан аж.
Тус компанийн 100 хувийн хувьцааг УИХ-ын гишүүн асан Б.Ундармаа эзэмшдэг байжээ.
Хөгжлийн Банкнаас авсан шууд зээл:
- "Монгол Мах экспо" ХХК "Мах боловсруулах төв байгуулах төсөл"-д 31 тэрбум төгрөг
- "Монгол эм импекс концерн" ХХК "Хатуу тугнагдсан эм болон дуслын шингэний үйлдвэр байгуулах төсөл"-д 7.2 тэрбум төгрөг
Арилжааны банкаар дамжуулан авсан зээл:
- "Юнико" ХХК "Полипропилен хоолой үйлдвэрлэл төсөл"-д 7.2 тэрбум төгрөг
- "Мөнххаан трейд" ХХК "Ноолуур 2015" төсөлд таван тэрбум төгрөг
- "Нью Даниста Рөү энд Констракшн" ХХК "Хавтан тавилгын үйлдвэр төсөл"-д 3.7 тэрбум төгрөг
- "Каракум" ХХК "Мах боловсруулах үйлдвэрийн төсөл"-д хоёр тэрбум төгрөг
- "Ялгуун Интернэшнл" ХХК "Шохойн үйлдвэр байгуулах төсөл"-д 1.9 тэрбум төгрөг
3. "Герман стандарт" ХХК "Гипсэн хавтангийн үйлдвэрийн төсөл" хэрэгжүүлэхээр 5.3 тэрбум төгрөгийн зээлийг Худалдаа хөгжлийн банкаар дамжуулан Хөгжлийн Банкнаас авсан.
Тус компанийн идэвхтэй хувьцааг УИХ-ын гишүүн асан Н.Цэрэнбат 34 хувийг, Д.Баттулга 33 хувийг, О.Амартүвшин 33 хувийг эзэмшиж байгаа аж. Гүйцэтгэх захирал Д.Баттулгыг гэрчээр дуудсан боловч ирээгүй. Зээлийн 584.36 сая төгрөгийг бэлэн зарлагаар, 1.9 тэрбум төгрөгийг дотоод шилжүүлэг, 2.5 тэрбум төгрөгийг гадаад шилжүүлэгт зарцуулжээ.
4. Сангийн дэд сайд асан С.Пүрэв өөрийн хамаарал бүхий хоёр компаниар дамжуулан 7.8 тэрбум төгрөгийн зээл авч бэлнээр зарцуулсан.
Тодруулбал:
- "Эс Ай Пи Эс Монголиа" ХХК "Угсармал Эс Ай Пи Эс бэлэн барилга үйлдвэрлэх төсөл"-д Улаанбаатар хотын банкаар дамжуулан таван тэрбум төгрөгийн зээл авсан.
Уг компанийн 50 хувийг "Гангар-Инвест" ХХК, үлдсэн 50 хувийг "Саннинүхт" ХХК эзэмшдэг байна. Зээл олгох үед "Гангар-Инвест" ХХК-ийн 70 хувийг тухайн үеийн Сангийн дэд сайд асан С.Пүрэв эзэмшдэг байжээ.
- "Хархорин" ХК "200 га талбайд чацаргана тариалж жимс үйлдвэрлэх төсөл"-ийг Өвөрхангай аймагт хэрэгжүүлэхээр Улаанбаатар хотын банкаар дамжуулан 2.8 тэрбум төгрөгийг авсан байна. Тус компанийн 100 хувийн хувьцааг Сангийн дэд сайд асан С.Пүрэв эзэмшдэг байсан.
5. "Ай Пи Даблью" ХХК "Ухаалаг угсармал орон сууцны төсөл" хэрэгжүүлэхээр 4.2 тэрбум төгрөгийн зээлийг 2015 онд Хөгжлийн Банкнаас Голомт банкаар дамжуулан авсан.
Тус компанийн 100 хувийн идэвхтэй хувьцааг М.Бат-Амгалан эзэмшдэг бөгөөд Ерөнхийлөгчийн Тамгын Газрын дарга асан П.Цагаан 2009 онд үүсгэн байгуулж, 20 хувийн хувьцааг эзэмшдэг байжээ.
6. "Хулагу Холдинг" ХХК Мах бэлтгэлийн чиглэлээр 950 сая төгрөгийн зээлийг Худалдаа хөгжлийн банкаар дамжуулан авсан.
Зээлийн зарцуулалтын хувьд 926 сая төгрөгийг бэлнээр авсан байна. Хамаарал бүхий байдлын хувьд Мэдрээгийн Мөнхтулга 33.34 хувийг, Б.Уранбаатар 33.33 хувийг, Б.Хатанзориг 33.33 хувийг эзэмшдэг. "Тус компанийн гүйцэтгэх захирал Мэдрээгийн Мөнхтулга нь Худалдаа хөгжлийн банкны захирлын хүүхэд юм. Тус банкны захирал өөрийнхөө хамаарал бүхий компанид зээл олгосон" хэмээн УИХ-ын гишүүн Б.Энхбаяр танилцууллаа.
7. "Кайзер флайшерай" ХХК "Нөөшилсөн мах махан бүтээгдэхүүн үйлдвэрлэл" хэрэгжүүлэхээр 2014 онд Төрийн банкаар дамжулан 2.9 тэрбум төгрөгийг авсан.
Хамаарал бүхий байдлын хувьд тухайн үеийн УИХ-ын гишүүн асан Д.Тэрбишдагва 100 хувийн хувьцаа эзэмшиж байжээ. Зээлийн зарцуулалтын хувьд 2.1 тэрбум төгрөгийг дотооддоо шилжүүлсэн байна.
8."Шохой цагаан булаг" ХХК "Гантиг чулуун хавтангийн үйлдвэр" төсөл хэрэгжүүлэхээр хоёр тэрбум төгрөгийг Үндэсний хөрөнгө оруулалтын банкаар дамжуулан авсан.
Тус компанийн 100 хувийн хувьцаа эзэмшигч Ж.Батбаяр нь УИХ-ын гишүүн асан Жамъянсүрэнгийн Батсуурийн төрсөн дүү аж. Зээлийн зарцуулалтын хувьд 815 сая төгрөгийг бэлэн зарлага, 655 сая төгрөгийг дотоод гүйлгээ, 558 сая төгрөгийг гадаад шилжүүлэг ашиглажээ.
9. "ЭХБУТрест" ХХК "Полиуретан дулаалгатай сэндвич үйлдвэрлэл" төсөл хэрэгжүүлэхээр 3.6 тэрбум төгрөгийн зээлийг Худалдаа хөгжлийн банкаар дамжуулан авсан.
Хамаарал бүхий байдлын хувьд тухайн үеийн Ерөнхийлөгчийн зөвлөх Лувсандашийн Дашдорж 19.9 хувийг, Д.Баттулга 20.4 хувийг, А.Цэлмэг 19.9 хувийг, С.Сүхтөмөр 19.9 хувийг, С.Жаргалсайхан 19.9 хувийг эзэмшдэг байна. Зээл ашиглалтын хувьд 214 сая төгрөгийн бэлэн зарлага, 1.4 тэрбум төгрөгийн дотоод шилжүүлэг, 781 сая төгрөгийг гадаад шилжүүлэг, 1.1 тэрбум төгрөгийг зээлийн төлөлтөд зарцуулсан" хэмээн Хөгжлийн Банкны сонсголын түр хорооны Шинжээч болон УИХ-ын гишүүн Б.Энхбаяр нар танилцууллаа.
