Б.Энхбаяр: "Бишрэлт" групп хамаарал бүхий компаниудаараа дамжуулан ₮59 тэрбумын зээлийг Хөгжлийн Банкнаас авсан

Бишрэл группийн хамаарал бүхий компаниудын зээлийн дүгнэлт

Хөгжлийн Банкны гурав дахь удаагийн сонсгол дөрөв дэх өдрөө Төрийн ордонд үргэлжилж байна. 

Сонсголын үеэр УИХ-ын гишүүн, Хянан шалгах түр хорооны дарга Б.Энхбаяр "Бишрэлт" группийн зээлийн нэгдсэн дүгнэлтийг танилцууллаа. 

Тэрбээр "Бишрэлт группийн Капитал банкны хамаарал бүхий этгээдүүд олон зээл дээр гарч ирсэн учраас нэгтгэж үзсэн. Капитал банкны хамаарал бүхий компаниуд Хөгжлийн Банкнаас шууд болон шууд бусаар дамжуулж ямар компаниудаар хэр их зээл авсан гэдгийг танилцуулъя. 

Шууд зээл:

• "Монгол Мах экспо" ХХК Мах боловсруулах төв байгуулах төсөлд 31 тэрбум төгрөг
• "Монгол эм импекс  концерн" ХХК Хатуу тугнагдсан эм болон дуслын шингэний үйлдвэр байгуулах төсөлд 7.2 тэрбум төгрөг

Дамжуулан авсан зээл:

• "Юнико" ХХК Полипропилен хоолой үйлдвэрлэл төсөлд 7.2 тэрбум төгрөг
• "Мөнххаан трейд" ХХК Ноолуур 2015 төсөлд таван тэрбум төгрөг 
• "Нью Даниста Рөү энд Констракшн" ХХК Хавтан тавилгын үйлдвэр төсөлд 3.7 тэрбум төгрөг
• "Каракум" ХХК Мах боловсруулах үйлдвэрийн төсөлд хоёр тэрбум төгрөг 
• "Ялгуун Интернэшнл" ХХК Шохойн үйлдвэр байгуулах төсөлд 1.9 тэрбум төгрөг

Нийтдээ 59.085 тэрбум төгрөгийн зээлийг Хөгжлийн Банкнаас шууд болон арилжааны банкнаас авсан гэх дүгнэлтийг танилцуулж байна" хэмээн ярив.