Озеки Оносато нэг ч унаагүй тэргүүлж байна

Мэргэжлийн сүмо бөхийн тавдугаар сарын башё үргэлжилж буй. Энэ тэмцээнд түрүүлбэл ёкозүна цолд хүрэх өндөр магадлалтай байгаа озеки Оносато 10 өдрийн дараагаар нэг ч уналгүй тэргүүлж байна.

Тэрбээр өнөөдөр маегаширагийн 4 Ичиямамотог ялснаар унаагүй амжилтаа үргэлжлүүлэв. 

Түүний араас украин бөх Аонишики 8 даваа, 1 унаатай байсан ч өнөөдөр комүсүби Вакатакакажэд ялагдсан юм. Мөн маегаширагийн 7-гоос барилдаж буй Хакүохо секиваки Дайеишод уналаа.

Ингэснээр тэргүүлэгчийн араас ёкозүна Хоошёорюү С.Бямбасүрэн нарын дөрвөн бөх хоёр унаатай нэхэж явна.

Озеки Оносато маргааш тэргүүлэгчдийн нэг комүсүби Вакатакакажэтэй оноолт таарах бол ёкозүна Хоошёорюү С.Бямбасүрэн ижил даваа, унаатай Хакүохотой хүч үзнэ.

Ёкозүна Хоошёорюү С.Бямбасүрэнгийн хувьд тэмцээний гурав болон дөрөв дэх өдөр дараалан унаснаас хойш зургаан барилдаанд хий гаргалгүй ялснаар 50 хувийн амжилтаа үзүүллээ. 

Дээд зиндаанд барилдаж буй монгол бөхчүүд

• Ёкозүна Хоошёорюү С.Бямбасүрэн - 8:2
• Секиваки Киришима Б.Лхагвасүрэн - 7:3
• Маегаширагийн 3 Тамаваши Б.Мөнх-Оргил - 3:7
• Маегаширагийн 5 Чиёшоома Г.Мөнхсайхан - 2:8
• Маегаширагийн 6 Ошома П.Дэлгэрбаяр - 7:3
• Маегаширагийн 8 Онокацү Б.Чойжилсүрэн - 6:4
• Маегаширагийн 17 Тамашохо Э.Энхманлай - 4:6