Б.Одбаяр: Саппорогоос Офицеруудын ордон хүртэл 22 автобусны буудлыг явган хүний чулуун замтай болгох ажил сар үргэлжилнэ

Өнгөрсөн дөрөвдүгээр сард Энхтайвны өргөн чөлөөний буюу төв зам дагуух автобусны буудлыг зогсоолгүй болгосон, явган хүний зам тавина. Автомашины хажуугийн зогсоолыг мөн хаасан, ногоон байгууламж болгоно гэж мэдээлж байв.

Энэ цагаас хойш автобусны буудлын бродюроор хаасан карман зогсоолыг хайрга, шороогоор дүүргэн иргэд тэр дунд нь туучиж явсаар өнөөдрийг хүртэл 20 шахуу хонолоо. 

Эдгээр талбайг хэзээ тохижуулах талаар Нийслэлийн Замын Хөгжлийн Газрын дарга Б.Одбаяраас асуухад "Энхтайвны өргөн чөлөө, Чингисийн өргөн чөлөө, Их тойруу, Бага тойруу, Олимпын гудамжны урд, хойд талын явган хүний замыг чулуун хавтантай болгох ажил үргэлжилж байна.

Энхтайвны өргөн чөлөөний явган хүний замыг тохижуулах ажил 10 дугаар хороололд хийгдэж байгаа. Үргэлжлээд төв зам дагуу Офицеруудын ордон хүртэлх автобусны карман зогсоолыг дүүргэсэн шороо, чулууг нягтаршуулж, явган хүний чулуун зам тавина.

Саппорогоос Офицеруудын ордон хүртэл нийт 22 автобусны буудлыг хажуугийн зогсоолгүй болгосон бөгөөд явган хүний чулуун замтай болгох юм. Энэхүү ажил нэг сар орчим хугацааны дараа дуусна. Явган хүний замыг тавьж байгаа гүйцэтгэгч компаниудад Нийслэлийн Хөрөнгө Оруулалтын Газраас хяналт тавьж ажиллаж байна.

Харин төв зам дагуух автомашины карман зогсоолуудын асфальт бетоныг хуулах ажлыг "Улаанбаатар АЗЗА" компани гүйцэтгэнэ. Асфальт бетоныг хуулсны дараа тус талбайд мод тарьж ногоон байгууламж болгоно. Уг ажилд шаардагдах хөрөнгө хотын Захирагчийн ажлын албаны төсөвт тусгагдсан" гэлээ.

Авто замын засвар, шинэчлэлтийн ажлыг шөнийн цагаар гүйцэтгэж байгаа бол явган хүний зам тавих ажил өдөр, шөнөгүй үргэлжилж байгааг тэрбээр тодотгов.

Төв зам дагуу карман зогсоолгүй болгосон шалтгааныг "Зохиомол түгжрэл үүсгэхгүйн тулд карман зогсоолыг хаасан бол иргэд автобусны буудлын карман зогсоолын авто зам дээр алхаж байж автобусанд суудаг учир тэдний аюулгүй байдлыг хамгаалж байгаа" хэмээн тайлбарлаж байсан юм.