"Төв зам дагуух автобусны буудлууд дээр явган хүний зам тавьж, автомашины зогсоолуудыг ногоон байгууламж болгоно"
Энхтайвны өргөн чөлөөний буюу төв замыг шинэчлэх ажил энэ оны хамгийн том засварын ажил гэдгийг албаныхан мэдэгдээд буй.
Харин уг өргөн чөлөөнд автобусны буудлын өмнөх талбай болон автомашины хажуугийн зогсоолыг хааж бродюр хийсэн байдалтай байна.
Энэ талаар Нийслэлийн Замын Хөгжлийн Газраас тодруулахад "Автобусны буудал дээр явган хүний зам буюу талбай хийнэ. Харин автомашины зогсоолын хэсгийг ногоон байгууламж болгоно.
Төв зам дагуу Сонгинохайрхан дүүргийн Саппорогоос Баянзүрх дүүргийн нутаг дэвсгэр, Офицеруудын ордон хүртэл автомашины хажуугийн зогсоолгүй болгож байгаа" гэж тайлбарлалаа.
Өнөөдрийн байдлаар нийслэл хотод Төмөр замын дээд сургуулийн уулзвараас Гранд плазагийн уулзвар хүртэлх авто замын хөдөлгөөнийг шөнийн цагаар хааж, зорчих хэсгийн суурийг солих ажил хийгдэж байгаа бөгөөд тавдугаар сарын 4-нд дуусгахаар төлөвлөжээ.
Түүнчлэн зуслангийн бүсийн замуудыг засварлаж байгаа билээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
