О.Энхбаатар: Зүүн дөрвөн замаас 25 дугаар эмийн сан хүртэлх замыг засварлах ажил өнөөдөр эхэллээ
Нийслэл хотын 2025 оны зам засвар, шинэчлэлийн ажил өнөөдрөөс эхэлжээ. Энэ талаар Нийслэлийн Замын Хөгжлийн Газраас/НЗХГ/ мэдээлэл өглөө.
Тус газрын Засвар, арчлалтын хяналтын хэлтсийн дарга О.Энхбаатар "Энэ онд нийслэлийн хэмжээнд 36 байршилд 74 километр авто замын засвар, шинэчлэлтийн ажил хийгдэнэ. Үүнээс 26 байршлынх он дамжин хэрэгжиж байгаа бол шинээр 10 байршлын замыг засварлана.
Өнөөдрөөс/2025.04.02/ нийслэлд зам засварын ажил эхэлж байна. Тодруулбал Энхтайвны өргөн чөлөө дэх Зүүн дөрвөн замаас 25 дугаар эмийн сан хүртэлх замыг засах ажил эхэллээ. Энэ хүрээнд замын хажуугийн автомашины зогсоолыг хааж хашлага, нүхэн эвдрэлийг засварлаж байна. Үүний дараа дөрөвдүгээр сарын 25-наас уг чиглэлийн замын асфальбетон хучилтыг хэсэгчлэн хийнэ.
Энэ онд Тэмээтэй хөшөөнөөс ТЭЦ-3-ын уулзвар, Тэмээтэй хөшөөнөөс Зайсангийн гүүр хүртэлх, Их тойруугийн буюу Баруун дөрвөн замаас Гэсэр сүмийн уулзвар хүртэл, Өлзий төвөөс Эвтэй дөрвөн амьтан хүртэлх, Шархадны эцэс хүртэлх гол замуудад шинээр хучилт хийхээр төлөвлөсөн" гэв.
Засварын ажилтай холбогдуулан зам хаах тухай мэдээллийг иргэдэд тухай бүрд хүргэнэ гэж тэрбээр хэллээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
9 СЭТГЭГДЭЛТЭЙ
|
