96 оюутан, залуус ажлын байранд зуучлагджээ

Монголын Залуучуудын Холбооны дэргэдэх Залуучуудын хөдөлмөрийн төв биржээс оюутан залуусын хөдөлмөр эрхлэлтийг нэмэгдүүлэх чиглэлээр олон үйл ажиллагааг санаачлан хэрэгжүүлж байгаагийн нэг нь “Цагийн ажил” буюу “PART TIME ” төсөл юм.

Энэхүү төслийн хүрээнд цагийн болон түр ажлын байрны зуучлал хийгдэхэд цагийн ажил хайгч залуусын 80 орчим хувь нь оюутан залуучууд байдаг бөгөөд долоо хоног бүрийн пүрэв гарагт цагийн ажил хайгч оюутан залууст зориулсан “Парт Тайм” ба “Цагийн ажил “ өдөрлөг уламжлал болон зохион байгуулагдсаар байгаа бөгөөд энэ пүрэв гарагт 13 дахь удаагаа амжилттай боллоо.

Мөн өдөр тутамд шинээр бүртгүүлсэн оюутан залуусын хувьд цагийн ажлын цалин хөлс, ажил олгогч байгууллагатай хэрхэн холбогдох вэ? Ажил олгогчтой хэрхэн уулзах вэ? Цагийн ажлыг хичээлийнхээ хажуугаар хэрхэн зөв зохион байгуулалттай хийх вэ гэдэг мэдээлэл дутмаг байдаг. Тийм ч учраас “Парт Тайм” сургалтаар энэ бүгдийг ойлгуулж чадавхжуулахыг зорьдог юм.

Энэ удаагийн сургалтад 96 цагийн ажлын байр нээлттэй байсан ба 122 ажил хайгч оролцож, 96 оюутан залуус ажлын байранд зуучлагдсан байна. Байнгын хамтарч ажилладаг байгууллага болох Бизнетворк, МЗХ-ны сургалт судалгааны Полиси төвөөс сургагч багш нэр ирж лекц уншсан юм.