Литва улсын нийслэл гадаадын эзлэн түрэмгийллийн үеэр иргэдээ нүүлгэн шилжүүлэх төлөвлөгөөтэй боллоо

Литва улсын нийслэл Вильнюс хотын захиргаа гадаадын эзлэн түрэмгийллийн үед оршин суугчдаа нүүлгэн шилжүүлэх төлөвлөгөө боловсруулснаа өчигдөр танилцуулжээ.

Дайсны хүч хотод ойртож ирсэн тохиолдолд 540,000 орчим хүнийг хэрхэн зохион байгуулалттай, аюул эрсдэл багатай нүүлгэх арга замыг уг төлөвлөгөөнд тусгасан байна.

Украины дайны улмаас Балтийн тэнгисийн эрэг орчмын бүс нутагт Оросын түрэмгийллээс болгоомжлох явдал нэмэгдээд буй цаг үед ийм төлөвлөгөө гарч байгаа юм.

Сүүлийн жилүүдэд Литва, Латви, Эстони улсууд энэ аюулаас өөрсдийгөө хамгаалахад ихээхэн анхаарал тавьж, хөрөнгө мөнгө зарцуулах болсон.

Вильнюс хот нь Оросын холбоотон Беларусь улстай залгадаг 679 км урт хилийн шугамд ойрхон оршдог юм.

Одоо Беларусь улсын нутаг дэвсгэрт Оросын олон мянган цэрэг байрладаг.

2022 оны хоёрдугаар сарын 24-нд Оросын цэрэг Украины нутаг дэвсгэрт халдан довтлоход Беларусь улс газар нутгаа ашиглуулж байсан түүхтэй.

НАТО-гийн гишүүн Литва улс нь бас Оросын үндсэн газар нутгаас хуурай газраар тусгаарлагдсан Калининград мужтай хил залгадаг юм.

Өчигдөр зарласан төлөвлөгөөнд Вильнюс хот даяар тэмдэглэсэн нүүлгэн шилжүүлэлтийн цэгүүд болон хотоос гарах замын 150 чиглэлийг үзүүлжээ.

Нүүлгэн шилжүүлэлт эхлэх болсныг гар утасны мессэж болон дуут дохиогоор зарлан мэдэгдэх гэнэ. Бас үүнд зориулагдсан гар утасны тусгай аппликэйшнийг удахгүй нэвтрүүлэхээр болжээ.

Гэхдээ энэ төлөвлөгөө нь Литва улсын зэвсэгт хүчин нийслэл хотоо хамгаалж дийлэхгүйд хүрсэн тохиолдолд авах эцсийн арга хэмжээ болохыг Вильнюсын захирагч Валдас Бенкунскас тайлбарласан байна.

Бас ийм төлөвлөгөө танилцуулсан нь аюул ойртсон гэсэн үг биш тул айж сандрахгүй тайван байхыг оршин суугчдадаа зөвлөжээ.

Төлөвлөгөөг боловсруулахдаа Оросын түрэмгийллийн эхэн үед Киев хотын удирдлагын авсан арга хэмжээнээс зарим санааг авсан гэнэ.

Мөн зөвхөн дайны үед ч биш, байгалийн гамшиг, дэд бүтцийн ноцтой осол гэмтлийн үед төлөвлөгөөг хэрэглэх боломжтой байхаар тооцоолжээ.

Литва улсын хил дагуу Беларусийн нутгийг Калининградтай холбодог “Сувалский Коридор” гэх нарийн зурвас газрыг цэргийн стратегичид эртнээс НАТО-гийн хамгаалалтын эмзэг хэсэг гэж үзсээр ирсэн байна.

Хэрвээ энэ зурвасыг Оросын зэвсэгт хүчин эзлэн авбал Балтийн гурван улс НАТО-гийн үндсэн бааз оршдог Польшоос тусгаарлагдах эрсдэлтэй юм.

Эх сурвалж: BBC