АНУ даяар Трампын засаг захиргааны үйл ажиллагааг эсэргүүцсэн хоёр дахь арга хэмжээ зохион байгуулагдлаа

Бямба гарагт АНУ даяар Трампын засаг захиргааны үйл ажиллагааг эсэргүүцсэн олон нийтийн арга хэмжээ зохион байгуулагджээ.

“50501” гэж нэрлэсэн уг арга хэмжээ нь “50 муж, 50 жагсаал, 1 хөдөлгөөн” гэсэн утгатай байв.

Энэ сарын эхээр бас нэг ийм арга хэмжээ АНУ даяар зохион байгуулагдахад хэдэн арван мянган хүн оролцож байсан юм. Сар хүрэхгүй хугацааны дотор хоёр дахь ийм эсэргүүцлийн арга хэмжээ зохион байгуулагдаж байна.

Иргэдийн төлөөлөл Цагаан ордон болон Тесла автомашины худалдааны төвүүдийн гадаа, хотын төв гудамж, талбайнуудад жагсжээ.

 

Энэ удаа жагсаалд оролцогчдын зарим хэсэг цагаачлалын албаныхны алдааны улмаас Эль Сальвадор улс руу гэмт хэрэгтнүүдтэй хамт ачигдсан АНУ-ын хууль ёсны иргэн Килмар Абрего Гарсиаг буцааж авчрахыг шаардаж байлаа.

Сүүлийн үеийн судалгаануудаас Трампын засаг захиргааны эдийн засгийн бодлого америкчуудын олонход таалагдахгүй байгаа нь харагдаж байгаа.

Gallup байгууллагын санал асуулгад оролцогчдын 45 хувь нь ерөнхийлөгч Трампын эхний улиралд явуулсан үйл ажиллагааг дэмжиж байгаагаа илэрхийлжээ.

Энэ нь түүний эхний бүрэн эрхийн хугацааны ижил цаг үед авсан санал асуулгын дүн 41 хувиас өндөр байгаа юм.

Гэхдээ 1952-аас 2020 онуудад ажиллаж байсан ерөнхийлөгч нарын эхний улирлын дундаж үнэлгээ болох 60 хувиас хамаагүй бага байна.

 

Жагсагчдын зарим хэсэг “No Kings” гэсэн уриатай самбар барьсан байсан нь Британийн колоничлолын эсрэг Америкийн Хувьсгалт Дайн эхэлсний 250 жилийн ойтой уг арга хэмжээ давхацсаныг харуулж байлаа. Энэ нь нөгөө талаар ерөнхийлөгч Трампын дураараа авирлах явдлыг давхар эсэргүүцсэн хэрэг байв.

Эх сурвалж: BBC