Энэтхэгийн өсвөр насны гурван хүү цахилгаан хэрэглэдэггүй, давсаар ажилладаг хөргөгч зохион бүтээжээ

Өнгөрсөн долоо хоногт 2025 оны Earth Prize шагналын эзнээр цахилгаанаар бус давсаар ажилладаг хөргөгч зохион бүтээсэн Энэтхэгийн өсвөр насны гурван хүү тодорсон юм.

The Earth Foundation сангаас жил бүр $100,000 зарцуулдаг энэ шагнал нь ерөнхий боловсролын сургуулийн сурагчдын байгаль орчинд ээлтэй бүтээлийг урамшуулах зорилготой байдаг.

Друв Чаудхари, Митран Ладханиа, Мридул Жайн нар Энэтхэгийн Индаур хотод амьдардаг, эцэг эх нь эрүүл мэндийн салбарт ажилладаг хүүхдүүд юм байна.

Цар тахлын үеэр вакциныг эрчим хүчгүй хөдөө орон нутагт тээвэрлэн хүргэхэд гардаг хүндрэлийг хараад тэдэнд цахилгаан хэрэглэдэггүй хөргөгч бүтээх санаа төрж байжээ.

Ингээд тэд давсаар ажилладаг Thermavault гэж нэрлэсэн хөргөгчөө зохион бүтээж, энэ оны Earth Prize уралдаанаас $12,500-ын шагнал хүртсэн байна.

Одоо тэд 200 ширхэг хөргөгч үйлдвэрлэж, 120 эмнэлэгт хэрэглүүлж туршихаар төлөвлөжээ.

Хэрвээ амжилттай болбол вакцинаас гадна бусад эм тариа, донорын эд эрхтнийг хүртэл тээвэрлэхэд ашиглаж болох юм байна.

Эхний туршилтаар Thermavault нь вакциныг 10-12 цагийн хугацаанд тохиромжтой нөхцөлд хадгалж чаджээ.

Зарим төрлийн давс усанд уусахдаа орчиндоо хөргөх нөлөө үзүүлдэг.

Учир нь энэ үеэр давсыг бүрдүүлэгч цэнэгтэй атом буюу ионууд задардаг бөгөөд энэ задрал хүрээлэн байгаа орчноосоо эрчим хүч шингээснээр усыг хөргөдөг байна.

Өсвөрийн зохион бүтээгчид интернэтээс 150 төрлийн давсны мэдээлэл цуглуулж, эдгээрээс хамгийн өндөр үр дүнтэй 20 давсыг сонгож байжээ.

Эцэст нь тэд аммонийн хлорид орчныхоо температурыг Цельсийн 2-6 хэмд байлгаж чаддагийг олж тогтоосон байна.

Энэ нь ихэнх вакцинд тохиромжтой хадгалах нөхцөл юм. Үүн дээр барийн гидроксидын октахидратыг нэмснээр Цельсийн 0 хэмээс доош хөргөлтийг үүсгэж чаджээ.

Ингэснээр донорын эд эрхтэн хадгалах, тээвэрлэх нөхцөлийг бүрдүүлж чадсан байна.

Одоо тэд шагналын мөнгөө Дэлхийн Эрүүл Мэндийн Байгууллагаас шинэ бүтээлдээ батламж авахад зарцуулахаар төлөвлөжээ. Ингэж чадвал тэдний бүтээлийг вакцины олон улсын түгээлт хариуцдаг Gavi байгууллага авч ашиглах боломжтой болох гэнэ.

Earth Prize уралдаан дэлхийн бүс нутаг тус бүрээс нэг шагналтныг тодруулдаг.

Чаудхари, Ладханиа, Жайн нар энэ жилийн шагналыг Ази тивээс хүртсэн юм. Харин дэлхийн шагналтныг дөрөвдүгээр сарын 22 хүртэл үргэлжлэх олон нийтийн санал асуулгаар тодруулах юм байна.

Эх сурвалж: Business Insider