Гүржийн эрх баригч намын үүсгэн байгуулагчийг АНУ хориг арга хэмжээгээр шийтгэлээ

Гүрж улсын эрх баригч Гүржийн Мөрөөдөл намыг үүсгэн байгуулагч, тэрбумтан Бидзина Иванишвилийг хориг арга хэмжээгээр шийтгэж байгаагаа АНУ-ын засаг захиргаа өчигдөр зарлажээ.

Иванишвили болон түүний нам Гүрж улсыг Европтой ойртон нэгдэх замаас гаргаж, Оросын нөлөөнд орох эрсдэл учруулж буйг АНУ-ын төрийн нарийн бичгийн дарга Энтони Блинкен мэдэгдсэн байна.

Оросын зах зээлд бизнес эрхлэн хөрөнгөжсөн Иванишвили одоогоор засгийн газарт ямар нэг албан тушаал хашдаггүй ч сүүлийн 12 жил эрх барьж буй намынхаа “хүндэт ерөнхийлөгч” статустай юм.

Гүржийн Мөрөөдөл нам энэ намар болсон сонгуулиудад ялсан ч үр дүн нь маргаантай хэвээр байгаа.

Тус намын засгийн газар Гүржийг Европын Холбоонд гишүүнээр элсүүлэх яриа хэлэлцээг зогсоосны улмаас иргэдийн дунд олныг хамарсан эсэргүүцлийн хөдөлгөөн өрнөөд байна.

Сөрөг хүчнийхэн луйврын аргаар сонгуульд ялсан үндэслэлээр Гүржийн Мөрөөдөл намын тэргүүлдэг шинэ парламентыг хүлээн зөвшөөрөөгүй юм.

Эрх баригчид өөрийн холбоотон Ард Түмний Хүч намын нэр дэвшигч, Манчестер Сити хөлбөмбөгийн клубийн тоглогч асан Михейл Кавелашвилийг ерөнхийлөгчөөр сонгосон нь Гүржийн улс төрийн хямралыг улам хурцатгаад байгаа.

Европын талыг хатуу баримталдаг өмнөх ерөнхийлөгч Саломе Зурабишвили шинэ сонгууль зарлах хүртэл албан тушаалаасаа буухаас татгалзаж байна.

“Иванишвилигийн удирдлага дор Гүржийн Мөрөөдөл нам Гүржийн иргэд, жагсагчид, хэвлэл мэдээллийн хэрэгсэл, хүний эрхийг хамгаалагчид, сөрөг хүчний зүтгэлтнүүдийн эсрэг хүчирхийлэл үйлдэж, хэлмэгдүүлж байгааг бид эрс буруушааж байна” гэж Блинкен мэдэгджээ.

Тэрбээр цааш нь “Үүний үр дүнд газар нутгийнх нь 20 хувийг эзлэн түрэмгийлэх ажлаа үргэлжлүүлж буй Оросын өмнө Гүрж улсыг улам эмзэг болгож байна” гэж хэлсэн юм.

Арваннэгдүгээр сард Гүржийн ерөнхий сайд Иракли Кобахидзе засгийн газар нь Европын Холбоонд элсэх яриа хэлэлцээг 2028 он хүртэл зогсоож буйг зарласнаар иргэдийн эсэргүүцлийн хөдөлгөөн эхэлж байв.

Эрх баригчид иргэдийн тэмцлийг дарахын тулд нулимс асгаруулагч хий, усан буу зэргийг ашигласан юм.

Их Британийн засгийн газар иргэдийн жагсаал тэмцлийг харгислан дарахад гол үүрэг гүйцэтгэсэн Гүржийн дотоод хэргийн сайд болон бусад таван өндөр албан тушаалтныг хориг арга хэмжээгээр шийтгэж байлаа.

Өнгөрсөн сард Европын парламент тус улсад болсон сүүлийн сонгуулийг Гүржийн “ардчиллын хямралын сүүлчийн үе шат” гэж тодорхойлсон тогтоолыг баталсан юм.

Сонгогчдыг айлган сүрдүүлсэн, сонгогчдын саналыг худалдаж авсан, урвуулан ашигласан, ажиглагчдыг дарамталсан зэрэг үйлдлүүдэд онцгойлон санаа зовж байгаагаа уг тогтоолд илэрхийлжээ.

Эх сурвалж: BBC