-Азербайжан улсын Баку хотоос iKon.mn сайтын сэтгүүлч П.Сайнжаргал мэдээлж байна-

Нэгдсэн Үндэстний Байгууллага(НҮБ)-ын Уур амьсгалын өөрчлөлтийн тухай конвенцын Талуудын 29 дугаар бага хурал(COP 29) Азербайжан улсын Баку хотод үргэлжилж байна.

Манай улсын зүгээс цөлжилттэй тэмцэх, дэлхийн дулаарлыг сааруулах зэрэг асуудлаар өөрсдийн байр суурийг илэрхийлэн цаашид уур амьсгалын өөрчлөлтийн эсрэг хэрэгжүүлэх ажлуудад санхүүжилт татан авах боломжийг эрэлхийлж байгаа юм. 

Үүний зэрэгцээ айлчлалын хүрээнд Азербайжаны талтай хийсэн уулзалт, санал дүгнэлтийн талаар Ерөнхийлөгчийн гадаад бодлогын зөвлөх Э.Одбаяраас тодруулснаа хүргэж байна. 

Тэрбээр хэлэхдээ "COP 29 бага хурлын үеэр Азербайжан улсын ерөнхийлөгч Илхам Алиевтай уулзаж байгаа нь түүхэн үйл явдал болж байгааг талууд онцлон тэмдэглэлээ. 

Түүнчлэн Монгол Улсад ойрын хугацаанд айлчлах хүсэлтэй байгаагаа Азербайжаны тал илэрхийлсэн.

Юун түрүүнд дэд сайдаар ахлуулсан Гадаад Харилцааны Яамныхаа төлөөлөгчдийг уул уурхай, эрчим хүч, зам тээвэр, боловсрол болон хувийн хэвшлийнхнийг оролцуулсан урьдчилсан багийг Монгол руу илгээж, айлчлалын бэлтгэл ажлыг хангах чиглэлд хоёр тал тохирч байна. 

Монгол Улсын ерөнхийлөгч урьдчилсан багийг найрсгаар хүлээн авч, Азербайжан улсын ерөнхийлөгч Ильхам Алиевийг ирэх жил хүлээн авах төлөвлөгөөндөө тусгасан байна" гэлээ. 

Үргэлжлүүлэн "Монгол Улс  уул уурхай, сэргээгдэх эрчим хүч, боловсрол, соёл, хүнс, хөдөө аж ахуй, хөнгөн үйлдвэрийн чиглэлээр Азербайжантай хамтран ажиллах боломжтой гэдгээ дэлгэрэнгүй тайлбарлаж хэллээ.

Тэдний зүгээс ч дээр дурдсан салбаруудыг сонирхож байна. Түүнчлэн ахан дүүсийн харилцаа холбоотой Узбекистан, Туркменистан, Тажикистан, Киргизстан, Турк улстай томоохон хөрөнгө оруулалт хийдгээ илэрхийлсэн. Үүний дагуу Монгол Улстай ч бүх салбарт харилцан ашигтай горимоор хамтарч ажиллахад бэлэн байгаагаа хэлж байгаа.

Үүнээс гадна Азербайжан улс нь Туркменистан, Узбекистан, Казахстан, Хятадын бараа бүтээгдэхүүнийг Каспийн тэнгис буюу өөрийн нутаг дэвсгэрээр Европын Холбоо болон бусад орнууд руу дамжин өнгөрүүлэх тээврийг эрхэлж байна. Тэдгээр орны худалдаа, эдийн засагт хөрөнгө оруулж хамтран ажилладаг.

Манай бараа бүтээгдэхүүнийг өөрсдөө худалдан аваад зогсохгүй Каспийн тэнгисийнхээ эргэн тойронд барьсан боомтуудаараа дамжуулан дамжин өнгөрөх тээврийг эрхлэх боломжтой гэдгээ санал болголоо. 

Цаашид олон салбарт харилцан ашигтай хамтын ажиллагаа өрнөх боломжтой юм байна. Үүнийг хоёр улсын ерөнхийлөгч хоорондоо ярилцаж тохиролцлоо. Одоо ажил хэргийн түвшинд Гадаад Харилцааны Яам болон салбар яамд хоорондоо уулзаж, энэхүү айлчлалын үр дүн ямар байгааг түрүүлж шийдэх ёстой" гэлээ. 

Азербайжан улс Баку хот