Л.Энх-Амгалан: Тэтгэвэр тогтоолгох хүсэлтийг их өгөгдөлд тулгуурлан цахимаар авах боломж бүрдүүлнэ
Монгол Улсын Засгийн газрын 2024-2028 оны үйл ажиллагааны хөтөлбөрт туссан “Нийгмийн даатгалын хамрах хүрээг өргөтгөж, нийгмийн даатгалын үйлчилгээг даатгуулагчийн эрэлт, хэрэгцээнд нийцүүлэн, их өгөгдөлд тулгуурлан, цаг хугацаа, орон зайнаас үл хамааран цахимаар авах боломжийг бүрдүүлэх” зорилтыг хэрэгжүүлэх зорилгоор Гэр бүл, хөдөлмөр, нийгмийн хамгааллын сайдын 2024.10.21-ний өдрийн А/101 тушаалаар салбар дундын Ажлын хэсэг байгуулагдан ажиллаж байна.
Ажлын хэсгийн ээлжит хурал өчигдөр болж, хурлаар Архивын Ерөнхий Газартай нийгмийн даатгалын сангаас олгох тэтгэвэр тогтооход шаардлагатай архивын мэдээллийг цахимаар солилцох, шалгах нөхцөлийг бүрдүүлэх талаар санал солилцжээ.
Мөн нийгмийн даатгалын сангаас олгодог хөдөлмөрийн чадвар алдсаны, ердийн болон олон хүүхэдтэй эхийн нөхцөлөөр тэтгэвэр тогтоолгох хүсэлтийг цахимаар авах боломжийг бүрдүүлэхэд хамтран ажиллахаар тохирсныг сайд Л.Энх-Амгалан мэдээлэв.
2024 оны есдүгээр сарын байдлаар нийгмийн даатгалын сангаас 482.3 мянган хүн тэтгэвэр авч байна.
Үүнээс
- өндөр насны тэтгэвэр авагч 399.2 мянга,
- хөдөлмөрийн чадвар алдсаны тэтгэвэр авагч 62.9 мянга,
- тэжээгчээ алдсаны тэтгэвэр авагч 20.1 мянган хүн байдаг.
Эх сурвалж: Гэр Бүл, Хөдөлмөр, Нийгмийн Хамгааллын Яам
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
