МҮЭХ-ны ерөнхийлөгчийн ажлаа давхар гүйцэтгэж буй С.Эрдэнэбат гишүүнд сахилгын хариуцлага тооцно

Гэрэл зургийг MPA агентлагийн онцгой зөвшөөрөлтэйгөөр ашиглав

УИХ-ын Ёс зүй, дэгийн байнгын хорооны өчигдрийн хуралдаанаар УИХ-ын гишүүн С.Эрдэнэбатын Монголын үйлдвэрчний эвлэлийн холбооны ерөнхийлөгчийн үүрэгт ажилтай холбоотой асуудлыг хэлэлцсэн байна. Тэрбээр МҮЭХ-ны ерөнхийлөгчөөр ажиллаж байгаад УИХ-ын сонгуульд МАН-аас жагсаалтаар нэр дэвшин, парламентын гишүүн болсон юм. Хэдийгээр УИХ-ын гишүүн нь ард түмний элч бөгөөд нийт иргэн, улсын ашиг сонирхлыг эрхэмлэнэ хэмээн хуульд заасан байдаг ч С.Эрдэнэбат гишүүний тухайд парламентын гишүүн үү, үйлдвэрчний эвлэлийн төлөөлөл үү гэдэг нь өнгөрсөн хугацаанд тодорхойгүй байсан гэж хэлж болно. Тухайлбал, тэрбээр энэ сарын 3-нд болсон үйлдвэрчний эвлэлийн байгууллагуудын хамтарсан жагсаалд оролцон, толгойдоо уриа лоозон уясан яваа нь фото зурагт үлджээ. 

С.Эрдэнэбат гишүүнтэй холбоотой энэхүү тодорхойгүй асуудлаар Улаанбаатар хотын Сүхбаатар дүүргийн 7 дугаар хорооны иргэн Э.Золжаргал УИХ-ын Ёс зүй, дэгийн байнгын хороонд хандсан байна. Иргэний өргөдөлд УИХ-ын гишүүн С.Эрдэнэбат нь Монгол Улсын Их Хурлын тухай хуулийн “Улсын Их Хурлын гишүүн төрийн бус байгууллагын хамтын шийдвэр гаргахаас бусад удирдах албан тушаал эрхлэх”-ийг хориглоно гэсэн заалтыг зөрчиж байна гэжээ. 

Энэ дагуу тус байнгын хорооны даргаас дээрх асуудлыг УИХ-ын гишүүн А.Ариунзаяад хянуулахаар хүргүүлсэн. УИХ-ын гишүүн А.Ариунзаяа уг асуудлаар С.Эрдэнэбат гишүүнтэй уулзаж, тайлбар авсан тухайгаа байнгын хорооны хуралд танилцуулсан байна.

Тэрбээр "УИХ-ын гишүүн С.Эрдэнэбат МҮЭХ-ны ерөнхийлөгчийн үүрэгт ажлаас чөлөөлөгдөх хүсэлтээ Ерөнхий зөвлөлдөө гаргасан байна. Ерөнхий зөвлөлөөс жилд хоёр удаагийн их хурал хийх боломжгүй тул дараа жил их хурлаа зарлана гэж шийдвэрлэсэн. Харин БНСУ-д МҮЭ-ийн урилгаар, мөн Монгол-Солонгосын парламентын бүлгийн гишүүний хувиар ажилласан. Мөн Хөдөлмөрийн 3 талт хэлэлцээрт өмнө нь хариуцан ажиллаж байсны хувьд тайлбар өгч оролцсон гэсэн тайлбар өгсөн" гэжээ.

Ёс зүй, дэгийн байнгын хорооноос томилогдсон гишүүний хувиар С.Эрдэнэбат гишүүнд МҮЭХ-ны ерөнхийлөгчийн ажлаа өгөх өргөдлөө нэн яаралтай шийдвэрлүүлэх шаардлагатай гэдгийг анхааруулжээ. Улмаар А.Ариунзаяа гишүүний зүгээс “Монгол Улсын Их Хурлын гишүүний ёс зүйн дүрэм”-ийн 4 дүгээр зүйлийн 4.13 дахь хэсгийг зөрчсөн гэж үзэж, Байнгын хорооны хуралдаанд “Монгол Улсын Их Хурлын гишүүний ёс зүйн дүрэм”-ийн 11.1.1-д заасны дагуу “сануулах” сахилгын хариуцлага тооцох нь зүйтэй гэсэн саналыг оруулсан байна.

Байнгын хорооны гишүүд энэхүү асуудлыг хэлэлцээд “Монгол Улсын Их Хурлын гишүүний ёс зүйн дүрэм”-ийн 4 дүгээр зүйлийн 4.13 дахь хэсгийг зөрчсөн байх тул УИХ-ын гишүүн С.Эрдэнэбатад “сануулга өгөх” сахилгын хариуцлага ногдуулах нь зүйтэй гэж үзжээ.