Хоол шүлстэж буйг харуулсан дүрс бичлэг дуулиан дэгдээсний дараа Японы сүши ресторан туузан дамжуулагчаа зогсоов
Японы томоохон сүлжээ ресторан Sushiro дуулиант дүрс бичлэг тарсантай холбоотойгоор туузан дамжуулагчийг үйл ажиллагаандаа хэрэглэхийг түр зогсоож байгааг Баасан гарагт зарлажээ.
Өмнө нь туузан дамжуулагч дээр бүх төрлийн хоол эргэлдэж, үйлчлүүлэгчид хүссэн хоолоо сонгож авдаг байв. Харин одоо үйлчлүүлэгчид хуруу мэдрэгчтэй дэлгэцээс урьдчилж хоолоо захиалах ёстой болжээ.
Энэ долоо хоногийн эхээр тус рестораны нэг салбарын туузан дамжуулагч дээрх хоол, хоолны хэрэгсэлтэй зүй бус харьцаж буйг харуулсан дүрс бичлэг сошиал орчинд тарж, олон сая хүнд хүрсэн юм.
Тухайлбал нэг үйлчлүүлэгч туузан дамжуулагчаас савтай сүмс, цайны аяга авснаа долоогоод буцааж тавих, шүлстсэн хуруугаараа урсаж буй тавагтай сүшинд хүрэх зэрэг зохисгүй үйлдэл гаргаж байжээ.
Энэ дуулианы дараа сүлжээ рестораныг эзэмшигч Akindo Sushiro компани тухайн үйлчлүүлэгчийн эсрэг цагдаагийн байгууллагад гомдол гаргасан юм.
Тодорхой хугацааны дараа туузан дамжуулагчаа дахин ашиглаж эхлэх талаар судлахаа Akindo Sushiro компанийн удирдлага амлажээ.
Эх сурвалж: Kyodo News
