Цахилгаан автомашины батарейн топ 10 үйлдвэрлэгчийн 6 нь Хятад, 3 нь Өмнөд Солонгос, 1 нь Японы компаниуд байна
Эрчим хүчний зах зээл судалдаг Өмнөд Солонгосын SNE Research компани өчигдөр дэлхийн цахилгаан автомашины батарейн тэргүүлэх 10 үйлдвэрлэгчийг зарлажээ.
2022 оны эхний арван нэгэн сарын зах зээлийн эзлэмжээр нь жагсаахад Хятадын 6, Өмнөд Солонгосын 3, Японы 1 компани тэргүүлсэн байна.
Эдгээрээс дэлхийн тэргүүлэх батарей үйлдвэрлэгч нь Хятадын Фужянь мужийн CATL (Contemporary Amperex Technology) болжээ.
Тус компани өнгөрсөн оны эхний 11 сарын хугацаанд нийт 165.7 гигаватт/цаг багтаамжтай батарей зах зээлд нийлүүлсэн нь өнгөрсөн оны мөн үеэс 101.8 хувиар өссөн үзүүлэлт болсон байна.
CATL компанийн дэлхийн зах зээлд эзлэх хувь хэмжээ 37.1 хувь болжээ. Энэ нь жилийн өмнөх 32.8 хувиас нэлээд өссөн үр дүн юм.
Топ 10-ын жагсаалтын 3-6 дугаар байруудыг Өмнөд Солонгос, Японы компаниуд эзэлж, бусад нь Хятадын компаниудад оногджээ. Жилийн өсөлтөөр нь харвал Хятадын компаниуд бүгд 100-аас дээш хувийн өсөлттэй, хамгийн бага өссөн нь Японы Панасоник 4.7 хувь байна.
Цахилгаан автомашины зах зээл ойрын жилүүдэд хурдтай өсөх төлөвтэй байгаа. Олон Улсын Эрчим Хүчний Агентлагийн гаргасан тооцооллоор 2022 онд дэлхий даяар заарагдсан нийт суудлын автомашины 13 хувь буюу 10 сая орчим нь цахилгаан хөдөлгүүртэй байх гэнэ.
Эндээс цахилгаан автомашины ирээдүй тодорхой харагдаж байгаа юм.
Эх сурвалж: South China Morning Post
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
34 СЭТГЭГДЭЛТЭЙ
|
