Баян-Өлгий, Ховд аймагт томилолтоор ажиллаад Улаанбаатарт буцаж ирсэн хоёр иргэний нэгээс нь КОВИД-19 халдвар илэрчээ
Улаанбаатар хотоос Баян-Өлгий, Ховд аймагт томилолтоор ажилласан хоёр иргэний нэг нь КОВИД-19-ийн халдвар авсан болох нь шинжилгээгээр батлагдаад байна.
Тодруулбал, тус иргэд нь Улаанбаатар хотоос Ховд аймгаар дайран өнгөрч Баян-Өлгий аймагт очиж ажиллан, буцах замдаа буюу энэ сарын 14-ний өдөр Ховд аймгийн Бүсийн оношилгоо эмчилгээний төвд ажиллаж тоног төхөөрөмж угсарсан байна. Өөрөөр хэлбэл Ховд аймагт таван цагийн хугацаатай ажиллаад мөн өдрөө Улаанбаатар хот руу гарсан аж.
Эдгээр иргэний хувьд Говь-Алтай, Өвөрхангай аймгуудаар дайран өнгөрч Улаанбаатар хотод гуравдугаар сарын 16-нд ирж, 18-нд шинжилгээ өгөхөд халдвартай болох нь тогтоогдсон аж.
Эх сурвалжийн мэдээлснээр уг иргэн нь гуравдугаар сарын 9-нд Улаанбаатар хотод PCR шинжилгээ өгөхөд сөрөг гарч маргааш нь буюу 10-нд орон нутгийг зорьсон байна.
Баян-Өлгий аймаг руу ороход нь түргэвчилсэн оношлуураар шинжилгээ авахад мөн сөрөг гарсан байна.
Болзошгүй эрсдлээс урьдчилан сэргийлэх үүднээс аймгийн Эрүүл мэндийн газар, Онцгой байдлын газар, Зооноз өвчин судлалын төв зэрэг мэргэжлийн байгууллагууд шуурхай ажиллаж, ойрын хавьтал болох 13 иргэнийг олж тогтоон PCR шинжилгээ авахад бүгд сөрөг гарчээ.
Эдгээр иргэнийг тусгаарлан ажиглаж байгаа ба давтан шинжилгээг ирэх долоо хоногийн Даваа гарагт мөн түүнээс хойш дахин долоо хоногийн дараа авах юм байна.
Ховд аймагт одоогоор КОВИД-19-ийн халдвар илрээгүй гэдгийг Ховд Аймгийн Засаг даргын тамгын газраас мэдээллээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
