Уншиж байна ...
Зураг
Зураг
ХУУЧИРСАН МЭДЭЭ: 2019/10/09-НД НИЙТЛЭГДСЭН

Н.Анхбаяр: Шинээр нээгдэх Консулын газар, Элчин сайдын яамдыг нийт есөн орон тоотойгоор ажиллуулна

А.Ням-Өлзий, iKon.mn
2019 оны 10 сарын 9
iKon.MN
Зураг зураг
Гэрэл зургийг mpa.mn

УИХ-ын Төрийн байгуулалтын байнгын хорооны хуралдаанаар БНХАУ-ын Манжуур хотод Консулын газар, Бүгд Найрамдах Беларусь улсын нийслэл Минск хотод Элчин сайдын яам, Арабын Нэгдсэн Эмират улсын нийслэл Абу Даби хотноо Элчин сайдын яам тус тус нээх асуудлыг хэлэлцэн дэмжлээ. 

Хэлэлцсэн асуудлын талаар ГХЯ-ны Төрийн захиргаа, удирдлагын газрын дарга Н.Анхбаяраас тодрууллаа. 

-БНХАУ-ын Манжуур хотод Консулын газар, БНБУ-ын Минск болон АНЭУ-ын Абу Даби хотуудад Элчин сайдын яамд шинээр нээх хэрэгцээ шаардлага юу байв?

-Бүгд Найрамдах Беларусь улс, Арабын Нэгдсэн Эмират улсууд манай улсад Элчин сайдын яамаа 2-3 жилийн өмнө нээсэн. Харилцан адил байх зарчмын хүрээнд айлын талаас дипломат шугамаар тавьж байгаа хүсэлтийг нь харгалзаад Элчин сайдын яамд нээх шаардлагатай гэж үзсэн. 

Минск бол Европоос Монголтой хийгдэж байгаа худалдааны дамжин өнгөрөх гол зангилаа боомт юм. Тэр утгаар нь Минск хотод дипломат төлөөллийн газраа байгуулж, худалдаа, эдийн засгийн харилцааг дэмжих тал дээр анхаарч ажиллах шаардлагатай байгаа. 

Хайлаар дахь Консулын газрыг түр хаачихсан учраас хилийн боомтуудтай ойрхон газар буюу Манжуурт бага орон тоотойгоор Консулын газар нээх гэж байна. Урд хилийн боомтуудаар манай улсын ачаа тээвэр их гардаг. Тиймээс иргэддээ ойр Консулын үйлчилгээ үзүүлэх шаардлагатай байгаа. 

-Консулын газар, Элчин сайдын яамдууд хэдэн орон тоотойгоор үйл ажиллагаа явуулах вэ?

-Гурвуулаа тус бүрдээ гурван орон тоотойгоор үйл ажиллагаа явуулна. Нийтдээ есөн орон тоо нэмэгдэнэ гэсэн үг. 

-Арабын Нэгдсэн Эмират улсад Элчин сайдын яам нээхэд тухайн улсаас тодорхой хэмжээний санхүүгийн дэмжлэг үзүүлнэ гэж байсан?

-Үйл ажиллагааны зардал дээр орон байр талаас нь ч юм уу тодорхой хэмжээнд санхүүгийн дэмжлэг үзүүлнэ гэдгээ тус улсын талаар илэрхийлсэн. Нээгдэхээр нь тодорхой болох байх. 

-Нэлээд олон оронд Элчин сайд, Ерөнхий Консулын орон тоо эзэнгүй байгаа. Эдгээр томилгоонууд хэзээ хийгдэх вэ? 

-Намрын ээлжит чуулган эхэлсэн болохоор зохих түвшинд санал боловсруулагдаад ойрын үед шийдэгдэх байх.    



Манжуур хот нь гурван улсын хилийн бүс нутагт байршилтай боомт хотоос гадна Улаанбаатар-Манжуурын чиглэлд “Хүннү-Эйр” ХХК долоо хоногт 5 удаа шууд нислэг үйлддэг, аялал жуулчлалын зорилгоор манай иргэд олноор зорчдог бөгөөд цаашид улам өсөх хандлагатай байгааг тэрбээр танилцуулгынхаа эхэнд дурдсан. Түүнчлэн дээр дурдсан хилийн боомтуудаар зорчиж буй иргэдийн эрх ашгийг хамгаалах, зөрчигдсөн тохиолдолд дэмжлэг туслалцаа үзүүлэхэд газар зүйн хувьд ойр байршилтай гэж үзжээ. Тухайлбал, 2017 онд давхардсан тоогоор манай 148,912 иргэн, 2018 онд давхардсан тоогоор 256,769 иргэн Сүмбэр-Рашаан, Хавирга-Ар хашаат, Баянхошуу-Өвдөг, Ханги-Мандал боомтуудаар дамжиж Манжуурт зорчсон байна. ӨМӨЗО-ны Хөлөнбуйр, Хянган аймгийг Манжуурын Консулын газрын тойрогт хамруулбал тус бүс нутагт буй БНХАУ-ын иргэд виз авахаар Эрээн хүртэл 1,500 орчим км зорчихгүйгээр Манжуураас авах боломжтой болох юм байна.  

БНХАУ-ын Манжуур хотод Монгол Улсын Консулын газрыг нээн ажиллуулснаар тус хот болон дээрх боомтуудаар зорчиж буй иргэдийн эрх ашгийг хамгаалах, тэдэнд консулын үйлчилгээг түргэн шуурхай хүргэх боломжтой болно гэж үзжээ. Манжуур дахь Консулын газрыг гурван орон тоотойгоор байгуулахаар төлөвлөж, зардлыг 2019 оны төсөвт тусгажээ.

Беларусь Улс нь Баруун Европын орнуудыг Азитай, Хар далайн эргийн бүс нутгийг Балтийн тэнгистэй холбох тээврийн гол зангилаа хэсэгт оршдог, дамжин өнгөрөх тээврийн чухал нутаг дэвсгэр бөгөөд экспортод чиглэсэн аж үйлдвэр, хөдөө аж ахуй, барилга, тээвэр зуучлалын салбар хөгжсөн, Евразийн эдийн засгийн холбооны гишүүн улс юм. 

Тус улстай хүнс, хөдөө аж ахуй, хөнгөн үйлдвэр, уул уурхай, зам тээвэр, логистикийн салбарт харилцан ашигтай хамтран ажиллах нөөц байгаа бөгөөд энэ хүрээнд Беларусийн уул уурхай, хөдөө аж ахуй, нийтийн тээврийн болон барилгын салбарын машин механизмийг хөнгөлөлттэй нөхцөлөөр худалдан авах, мал аж ахуйн түүхий эдийг боловсруулах хамтарсан төслүүд хэрэгжүүлэхээр ажиллаж байна аж.

Хоёр улсын Засгийн газарт хөдөө аж ахуй, барилга, хот байгуулалт, тээвэр логистикийн салбарыг харилцан ашигтай, бие биеэ нөхсөн хэлбэрээр хөгжүүлэх сонирхол, боломжтой. Түүний дотор сүүний кластер, агро хотхон, керамик шил, лифтний үйлдвэрийг байгуулах, манай улсын хөдөө аж ахуйн бүтээгдэхүүний экспортыг дэмжихэд чиглэсэн төсөл, хөтөлбөрүүдийг хэрэгжүүлэх бүрэн боломжтой юм. Беларусь Улсад Элчин сайдын яамтай болсноор дээрх төсөл, хөтөлбөрүүдийг хэрэгжүүлэхийн зэрэгцээ хил, гааль, худалдааны чиглэлээр хамтын ажиллагааг өргөжүүлж, манай улсын экспорт, импортын барааны эргэлтийг сайжруулах, тээвэр, логистикийн төслийг хэрэгжүүлэх, Брестийн боомтоор дамжин манай улсад ирж буй ачаа, тээврийн үнэ, тарифыг бууруулах чиглэлээр үр дүнтэй ажиллах нөхцөл бүрдэнэ гэж үзжээ.

Беларусь Улс дахь Элчин сайдын яамыг 3 орон тоотой байгуулахаар төлөвлөж, зардлыг 2019 оны төсөвт тусгажээ.

АНЭУ-д Элчин сайдын яам байгуулснаар Абу Дабигийн хөгжлийн сан, Абу Дабигийн хөрөнгө оруулалтын газар зэрэг хөгжлийн сан, санхүүгийн байгууллагуудтай шууд холбоо тогтоон, ойр хамтран ажиллах, хувийн хэвшлийн хүрээнд хамтын ажиллагааг дэмжих замаар хөрөнгө оруулалт татах зэрэг шинэ боломж нээгдэнэ гэж Засгийн газраас үзжээ. Тухайлбал, Эмират Улс нь махны хэрэгцээнийхээ 90 орчим хувийг гаднаас импортоор авдаг, махны эрэлт хэрэгцээ нь хурдацтайгаар нэмэгдэж байгаа тул манай улс мах экспортлох чиглэлээр хамтран ажиллах бүрэн боломжтой гэж үзжээ.

АНЭУ-ын Абу Даби хотод 102 орны Элчин сайдын яам, Дубай хотод 57 орны Консулын газар ажилладаг, АНЭУ Элчин сайдын яамаа Улаанбаатар хотод 2016 онд нээсэн байна.

Иймд харилцан адил байх зарчмын хүрээнд хоёр талын худалдаа, эдийн засгийн харилцааг өргөжүүлэх, хамтын ажиллагааны нөөц бололцоог бүрэн дүүрэн ашиглах зорилгоор Арабын Нэгдсэн Эмират Улсын нийслэл Абу Даби хотод Монгол Улсын Элчин сайдын яам байгуулах нь зүйтэй гэж үзсэн байна. Абу Даби дахь Элчин сайдын яамыг гурван орон тоотой байгуулахаар төлөвлөсөн бөгөөд Эмиратын талаас зарим зардлыг хариуцахаа мэдэгдсэн хэмээн танилцууллаа.