Багшийн мэргэжил дээшлүүлэх институтийн 70 ажилтны 68-д нь ажлаас чөлөөлөх мэдэгдэл өгчээ
Багшийн мэргэжил дээшлүүлэх институт/БМДИ/-ын нийт ажилтан албан хаагчид буюу 70 ажилтны 68-д/Захирал, дэд захирал хоёроос бусдад/ нь ажлаас чөлөөлөх мэдэгдэх хуудас өгсөн талаар тус институтийн аргазүйч Б.Цогбадрах өөрийн фэйсбүүк хуудастаа мэдээлжээ.
Түүнээс болон БМДИ-ийн захирлын орлон гүйцэтгэгч Д.Сүрэнчимэгээс энэ талаар тодруулсан юм.
"Есдүгээр сарын 7-ны өдрөөс бид ажилгүй болох нөхцөл байдал үүсээд байна"
БМДИ-ийн Цахим сургалтын албаны Байгалийн ухааны цахим сургалтын аргазүйч Б.Цогбадрах "Манайх Сангийн яамнаас 70 хүний орон тоогоор санхүүждэг БСШУСЯ-ны харьяа байгууллага.
Арга зүйч нар жилийн яг энэ үед буюу наймдугаар сарын эхээс хичээл эхлэх хүртэл маш завгүй ачаалалтай, сургалттай байдаг. Хичээл эхэлмэгц багш нар хичээлээ хэрхэн заах талаар зөвлөмжийг энэ өдрүүдэд өгдөг юм.
Захирлын үүргийг түр олон гүйцэтгэгч Д.Сүрэнчимэг тавдугаар сард томилогдож ирсэн ч биднийг сургалттай гадуур ажиллаж байх үеэр буюу наймдугаар сарын 7-ны өдөр дуудаж, хүн нэг бүрт ажлаас чөлөөлөгдөх мэдэгдэх хуудсыг гардуулан өгсөн.
Ингээд сарын дараанаас буюу есдүгээр сарын 7-ны өдрөөс бид ажилгүй болох нөхцөл байдал үүсээд байна. Жирэмсний амралттай байсан хүмүүсийг хүртэл дуудаж авчраад мэдэгдэх хуудас өгсөн.
Тэгээд бүтцийн өөрчлөлт хийж байгаа учир та бүхэн дахин сонгон шалгаруулалтад оролцоод шинэ ажлын байранд орох боломжтой гэсэн. Шинэ бүтцийг харахад миний хувьд өмнө нь ажиллаж байсан чиг үүргийнхээ дагуу ажлын байранд ажиллах боломжгүй юм байна лээ. Учир нь тус ажилд мэдээллийн технологийн чиглэлийн мэргэжилтэй хүнийг авна гэж заасан байгаа юм. Би физикийн багш мэргэжилтэй ч Монголын боловсролын системд онлайн, зайн сургалтыг оруулж ирэхээр 20 гаруй жил ажиллаж ирсэн багш нарын нэг.
Мэдэгдэл гардуулж өгөх үеэр би Д.Сүрэнчимэг захирлаас "Миний хувьд ажилгүй болж байгаа юм байна. Тийм ээ" гэж асуухад тэр шууд л "Тийм" гэж хариулсан. Тийм учраас физикийн багшаараа ажиллана гээд зар тавьсан. Хэд хэдэн сургуулиас надад санал ирсэн. Гэхдээ үлдэж байгаа хэдэн залуу арга зүйчдээ ажилтай нь үлдээчих юмсан гэсэндээ асуудлыг олон нийтийн сүлжээнд мэдээлсэн" хэмээн ярилаа.
"Ямар нэгэн хууль зөрчсөн болон хоморголон халсан зүйл байхгүй"
БМДИ-ийн захирлын орлон гүйцэтгэгч Д.Сүрэнчимэг "2018 оны зургаадугаар сард Боловсролын хөгжлийг дэмжих тухай хууль батлагдсан. Уг хуулийн хүрээнд БМДИ Их, дээд сургууль, МСҮТ-үүдийн багш нарын хөгжлийг бас хариуцан ажиллахаар болсон. Тиймээс одоогийн буюу 70 хүний орон тоондоо багтаагаад бүтцийн өөрчлөлт хий гэсэн Сайдын тушаал гарсан. Үүний дагуу ажилтнуудад ажлаас чөлөөлөх мэдэгдэх хуудсыг гардуулсан. Энэ бол бүх ажилтныг ажлаас халж байгаа хэрэг огт биш. Мэдэгдэлтэй хамт бүтцийн өөрчлөлтийн дараах ажлын байруудын жагсаалт болон сонгон шалгаруулалтад оролцох зөвлөмжийг өгсөн.
Мэдэгдэл өгөх үеэр би өөрөө ажилтнуудад тайлбарласан. Та ямар аль ажлын байранд очиж ажиллахыг хүсч байгаа талаар төсөөлөл, төлөвлөгөөгөө гаргаад, өөрийнхөө хөгжлийн төлөвлөгөөг боловсруулаад ирээрэй. Та бүхнийг тохирох ажлын байрууддаа очсоны дараа үлдсэн орон тоонд нээллтэй сонгон шалгаруулалт зарлана гэдгээ ч хэлсэн.
Мөн арга зүйч нар бакалаврын зэрэгтэй багш нарыг хөгжүүлэх чиглэлээр ажилладаг учраас магистраас дээш зэрэгтэй байх ёстой гэсэн шийдвэрийг 2018 оны наймдугаар сарын 6-ны өдрийн захирлуудын зөвлөлийн хурлаас гаргасан. Манайд олон магистрын зэрэггүй арга зүйч байгаа. Тиймээс энэ намраас магистрын ангид элсэн суралцахаар төлөвлөж байгаа, суралцаж байгаа бол ажиллуулах боломжтой гэж үзэж байгаагаа ажилтнууддаа хэлсэн.
Үүнд ямар нэгэн хууль зөрчсөн болон хоморголон халсан зүйл байхгүй.
Би 2018 оны тавдугаар сард томилогдож ирсэн. Түүнээс хойш нэг ч хүнийг ажлаас халаагүй. Надад хэн нэгнийг халах, солих сонирхол байхгүй" хэмээн хэллээ.
Боловсролын Сайдын тушаал, бүтцийн өөрчлөлтөөр бий болох шинэ бүтэц, ажилтнуудад өгсөн зөвлөмж болон ажлаас чөлөөлөх мэдэгдэх хуудас.
/Зураг дээр дарж томруулж үзнэ үү/
