Шинэ төхөөрөмж хүний харааг насан туршид нь төгс болгоно
Канадын Бритиш Колумби мужийн оптометрист, доктор Гарт Уэбб хэвийн хараатай хүний харах чадварыг гурав дахин сайжруулах төхөөрөмж бүтээжээ.
Ингэснээр хүн төрөлхтөн нүдний шил, контакт линз зэргээс бүр мөсөн салах юм байна.
Уэббын баг сүүлийн найман жил судалгаа хийсний дүнд “Ocumetrics Bionic Lens” нэртэй төхөөрөмж бүтээж олон улсад патентжуулжээ.
Уг төхөөрөмж нь жижигхэн товчны хэмжээтэй.
Түүнийг хүний нүдэнд 8 минутанд ямар нэг өвдөлт, зовиургүй хагалгаа хийх замаар суулгадаг.
Суусны дараа 10 секундын дотор өөрөө задарч тухайн хүний нүдний хараанд тохируулагддаг гэнэ.
Уэбб “та 3 метрийн зайнаас цаг хэд болж байгааг харж чаддаг байсан бол одоо бараг 10 метрийн зайнаас хардаг болно” гэв.
Өөрөөр хэлбэл хэвийн хэмжээний хараатай хүний харах чадварыг гурав дахин нэмэгдүүлнэ.
Төхөөрөмж нь хүний нүдэнд ямар ч сөрөг нөлөөгүй, лазер хагалгааны үүсгэдэг сөрөг нөлөөллүүд тохиолддоггүй гэнэ.
Анхны Ocumetrics Bionic Lens нь 2017 онд суулгагдаж эхлэх ба зөвхөн 25-аас дээш насныханд хийгдэх гэнэ. Учир нь энэ наснаас өмнө хүний хараа бүрэн тогтворжоогүй байдаг юм байна.
Эх сурвалж: Business Insider
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
30 СЭТГЭГДЭЛТЭЙ
|
