АНУ-ын хөрөнгийн зах зээлийн уналт үргэлжилж, Трамп бэрхшээлтэй тулгарснаа хүлээн зөвшөөрөв

Өчигдөр буюу Пүрэв гарагт Трампын зарласан худалдааны дайны улмаас АНУ-ын хөрөнгийн зах зээлийн индексүүд үргэлжлэн уналаа.

Өмнөх өдөр нь Трамп дэлхийн ихэнх улс орнуудын бараанд оноохоор төлөвлөсөн импортын татвараа 90 хоногоор хойшлуулах шийдвэр гаргасны дараа зах зээл түүхэн өсөлт үзүүлсэн юм.

Гэсэн хэдий ч АНУ-ын гол худалдааны түншүүдийн нэг Хятад улстай явуулж буй худалдааны дайн улам гүнзгийрсэн нь хөрөнгө оруулагчдын айдсыг дахин сэдрээлээ.

Цагаан ордны өчигдөр өгсөн мэдээллээр бол Хятадын зарим бараа бүтээгдэхүүний импортын татвар 145 хувь хүртэл нэмэгдэж байгаа юм байна. Тухайлбал фентанилын нийлүүлэлттэй холбоотой шийтгэл болгон өмнө нь оноосон 20 хувийн татвар дээр сүүлд зарласан 125 хувийн татвар нэмэгдэхэд зарим барааны татвар ийм өндөр болж байгаа ажээ.

Хятад улстай тохиролцоонд хүрнэ гэж найдаж байгаагаа Трамп өчигдөр дахин илэрхийлсэн байна.

“Бид хоёр улсад аль алинд нь маш сайн зүйл хийж чадна гэж бодож байна. Би ийм боломж гарах цаг мөчийг хүлээж байна” гэж хэлснээс нь үзвэл тэр Хятадын тал түрүүлж буулт хийхийг хүлээж байгаа бололтой.

Гэсэн хэдий ч Бээжингээс буулт хийх шинж тэмдэг харагдахгүй байна. Трампын шийдвэрийн хариуд Хятад улс АНУ-ын импортын барааны татварыг 84 хувь болгон өсгөөд байгаа.

Өчигдөр АНУ-ын хөрөнгийн зах зээлийн гурван гол индекс болох S&P 500 3.6 хувь, Dow Jones 2.5 хувь, Nasdaq 4.31 хувийн уналттай хаагдсан юм.

Өчигдөр болсон засгийн газрын хуралдааныхаа үеэр Трамп “шилжилтийн үе үргэлж хүнд хэцүү байдаг” гэж хэлсэн нь Америкийг дахин хүчирхэг болгох төлөвлөгөөнд нь бэрхшээл тулгарсныг анх удаа хүлээн зөвшөөрсөн хэрэг байв.

Гэсэн хэдий ч тэр дэлхийн ихэнх улс орнууд худалдааны нөхцөлөө шинэчлэх асуудлаар АНУ-д хандаж эхэлсэн, хөрөнгө оруулагчид засаг захиргааных нь үйл ажиллагаанд сэтгэл хангалуун байгааг бас мэдэгдсэн байна.

Сүүлд АНУ-ын худалдааны сайд Ховард Лютник мөн Трампын ярьсныг давтаж, хэрвээ ерөнхийлөгч нь ийм арга хэмжээ аваагүй бол нөхцөл байдал ингэж өөрчлөгдөхгүй байсныг хэлжээ.

“Бид хүртэх ёстой хүндлэлээ одоо л хүртэж эхэлж байна. Удахгүй та бүхэн түүхэн гэрээ хэлэлцээрүүд ар араасаа байгуулагдахыг харах болно” гэж тэр мэдэгдсэн байна.

Өчигдөр Хятадын засгийн газар өөрийн зах зээлд АНУ-д бүтээсэн кинонуудыг үзүүлэх тоогоо хязгаарлах шийдвэрээ зарласан юм.

Одоогоор Бээжин өөрийн зах зээлд гаргах АНУ-ын шинэ киноны тоог жилийн 34-өөр хязгаарласан байдаг бөгөөд Хятадын кино урлаг улам хөгжиж байгаа тул үзэгчдэд нь Холливүүдийн бүтээлүүд тийм ч чухал биш болоод байгаа.

Өчигдөр бас Европын Холбоо дөрөвдүгээр сарын 15-наас хэрэгжүүлэхээр бэлдэж байсан АНУ-ын барааны импортын өндөр татвараа 90 хоногоор хойшлуулах шийдвэрийг зарласан байна. Өмнө нь Трамп тус холбооны бараа бүтээгдэхүүнд 20 хувийн татвар төлөвлөөд байснаа 90 хоногоор хойшлуулсан нь үүнд нөлөөлжээ.

Өмнөх өдөр нь Унгараас бусад Европын Холбооны бүх 26 гишүүн улс хэрвээ АНУ-ын 20 хувийн татвар хэрэгжиж эхэлбэл ижил хариу арга хэмжээ авах төлөвлөгөөг санал нэгтэй дэмжсэн юм.

Эх сурвалж: BBC