Хятадын импортын татварыг 80 хувьд хүргэж бууруулах саналыг Трамп гаргав

АНУ-д нийлүүлдэг Хятадын бараа бүтээгдэхүүний татварыг бууруулах саналаа ерөнхийлөгч Дональд Трамп өчигдөр илэрхийлсэн нь дэлхийн хамгийн том эдийн засагтай хоёр гүрний хооронд дэгдсэн худалдааны дайныг хурцадмал байдлаас гаргах хүсэл сонирхолтой байгаагийн нэг илрэл болсон байна.

Энэ долоо хоногийн амралтын өдрүүдэд хоёр улсын төлөөлөгчид анх удаа худалдааны маргаан зөрчлөө шийдвэрлэх зорилгоор Швейцарт уулзах гэж байгаа юм.

“Хятадад 80 хувийн татвар ногдуулах нь зөв мэт санагдаж байна” гэж Трамп сошиал хуудсандаа бичжээ.

Хятадын гадаад хэргийн дэд сайд Хуа Чуньин мөн уулзалтын өмнө Бээжин АНУ-тай худалдааны асуудлаа зохицуулж чадна гэдэгтээ итгэлтэй байгааг мэдэгдсэн нь нөгөө талын хүсэл сонирхлыг харуулсан байна.

Дөрөвдүгээр сарын эхээр Трампын засаг захиргаа Хятадын бараа бүтээгдэхүүний импортын татварыг 145 хувьд хүргэсэн нь дэлхийн санхүүгийн зах зээлийг цочроосон үйл явдал байлаа.

Үүний улмаас дөрөвдүгээр сард АНУ-ыг чиглэсэн Хятадын экспортын хэмжээ өнгөрсөн оны мөн үетэй харьцуулахад 20 гаруй хувиар буурсныг албаны тоо баримт харуулсан байна.

Гэхдээ Хятадын нийт экспортын хэмжээ ижил хугацаанд 8.1 хувиар өссөн нь төсөөлж байснаас сайн үзүүлэлт байлаа.

Сар гаруй хугацаанд хоёр улс түрүүлж буулт хийхээс зайлсхийсээр байсан юм.

Эхний ээлжийн уулзалтад оролцох АНУ-ын төлөөлөгчдийг сангийн сайд Скотт Бессэнт, Хятадын төлөөлөгчдийг ерөнхий сайдын орлогч Хэ Лифэн тэргүүлэхээр болжээ.

Гэхдээ эхний уулзалтаар талууд маргаан зөрчлөө бүрмөсөн шийдвэрлэж чадахгүй гэж ажиглагчид үзэж байна.

“Хоёр талын харилцан нэгэндээ ногдуулсан өндөр татварыг бууруулах нь энэ уулзалтын бодит зорилго байх болов уу. Гэхдээ татварын хэмжээ өндөр, бусад саад хязгаарлалтууд хэвээр үлдэж магадгүй” гэж Олон Улсын Валютын Сангийн Хятад дахь салбарын захирал асан Эсвар Прасад ярьжээ.

Өчигдрийн мэдэгдэлдээ Трамп зах зээлээ АНУ-д нээж өгөхийг Хятадын талд уриалсан байна.

Мөн татварын хэмжээг ямар түвшинд хүргэж бууруулах нь “Скотт Бессэнтийн мэдэх хэрэг” гэж мэдэгджээ.

Пүрэв гарагт Трамп энэ уулзалтыг “маш найрсаг” болно гэдэгт итгэж байгаагаа илэрхийлсэн юм.

Тухайн өдөр АНУ, Их Британи улсууд худалдааны маргаан зөрчлөө арилгах эхний ээлжийн тохиролцоонд хүрснээ зарлаж байв.

АНУ-ын тал Их Британийн зарим автомашины импортын татварыг бууруулж, ган, хөнгөн цагааныг татваргүй нэвтрүүлэхээр болсон бол хариуд нь Их Британийн тал АНУ-ын үхрийн мах болон бусад барааг зах зээлдээ нэвтрүүлэхээр болсон байна.

Трамп дөрөвдүгээр сарын эхээр дэлхийн ихэнх улс орны бараа бүтээгдэхүүнд импортын “харилцан татвар” гэх зүйлийг нэвтрүүлэх болсноо зарлаж байв.

Гэхдээ тэр яриа хэлэлцээ хийх боломж олгох зорилгоор энэ шийдвэрийнхээ хэрэгжилтийг 90 хоногоор хойшлуулсан юм.

Ингэхдээ зөвхөн Хятад улсын бараа бүтээгдэхүүний татварын хэрэгжилтийг хойшлуулалгүй үлдээж байжээ.

Эх сурвалж: BBC