"Шүүхээс эцэслэн шийдэгдээгүй байхад буулгалтын процесс явагдаж байгаа нь хууль зөрчиж байгаа үйлдэл"

Гэрэл зургийг MPA агентлагийн онцгой зөвшөөрөлтэйгөөр ашиглав

Сүхбаатар дүүргийн нэгдүгээр хорооны нутагт дэвсгэрт хуучнаар Ленин клубийн ар талд барьж буй барилга байгууламжийг өнөөдөр албадан буулгахаар болж, албаны хүн болон ААН-ийн удирдлага хооронд маргаан гарсан талаар бид өмнө нь мэдээлсэн юм.

Маргаан дагуулаад байгаа газрын эзэмшигчид нь хэвлэлийнхэнд хандсан байна.

Энэ талаар газар эзэмшигч “Orgil MGL” ХХК-ийн өмгөөлөгч н.Түмэнбаяр  "Барилгыг албадан буулгах тухай Засаг даргын захирамж гарсан. Уг захирамжтай холбоотойгоор захиргааны хэргийн шүүхэд компанийн зүгээс нэхэмжлэл гаргасан юм. Хүсэлтийн дагуу тавдугаар сарын 15-ны өдөр шүүх хурал товлогдсон. 

Мөн өнөөдөр шүүхээс Нийслэлийн Цагдаагийн Удирдах газар болон Засаг даргад мэдэгдэл хүргүүлсэн. Уг мэдэгдэлд "Уг барилга болон газартай холбоотой асуудлаар захиргааны хэргийн хянана шийдвэрлэх ажиллагаа явагдаж байгаа тул барилга буулгах болон үүнтэй холбоотой тодорхой үйлдэл гаргахгүй байхыг шаардаж байна" гэсэн байна.

Шүүхээс эцэслэн шийдэгдээгүй байхад буулгалтын процесс явагдаж байгаа нь хууль зөрчиж байгаа үйлдэл. Захиргааны акт гараад энэ асуудлаар иргэн, хуулийн этгээд эрх зөрчигдөж байна гэж үзвэл 30 хоногийн дотор гомдол гаргаад шүүхэд нэхэмжлэл гаргах эрхтэй байдаг. Гэтэл энэ эрхийг нь эдлүүлэхгүй байгаа нь буруу.

Барилгыг буулга гэдэг шүүхийн шийдвэр огт гараагүй. Тэр ч бүү хэл барилга барих зөвшөөрлийг нь цуцлах шийдвэр ч байхгүй. 

"Orgil MGL" ХХК нь барилгын болон газрын тухай хуульд заасан журмын дагуу бүх бичиг баримтыг албан ёсоор бүрдүүлээд барилгын ажлыг эхлүүлсэн. Харин Нийслэлийн удирдлагуудын мэдэгдэж байгаа шиг хууль бусаар, зөвшөөрөлгүй, бусдын газар дээр барилга барьсан асуудал огт гараагүй. 

Манай компани албан ёсоор энэ газрыг 15 жилийн хугацаатай эзэмшигчээр эрхийг нь авсан. Бүр өмнө нь байсан объектыг буулгах зөвшөөрлийг нь аваад барилгын ажлаа эхлүүлсэн.

Барилга байгууламжийг албадан буулгаж, газар чөлөөлөх тухай захирамжийг тавдугаар сарын 1-ний өдөр гаргасан. Үүнийгээ өнгөрсөн долоо хоногийн Бямба гарагт буюу ажлын бус өдрөөр танилцуулсан. Ингээд хоёр хоногийн өмнө буюу тавдугаар сарын 7-ны өдөр газар эзэмших зөвшөөрлийг цуцалсан шийдвэр гаргажээ. Энэ шийдвэрээ өнөөдөр бидэнд танилцууллаа.

Тодруулбал ийм захирамж гарсан гэдгийг буулгалтын ажиллагаа эхлэх үед л мэдсэн. Хуульд зааснаар бол ямар нэг захирамж гарсан бол түүнийгээ бичгээр танилцуулаад эрх бүхий байгууллага бүрэн шийдвэрлэсний дараа буулгалтын ажиллагаа явагдах ёстой юм" гэв.

ФОТО