Хуучнаар Ленин клубийн ар талын барилгыг буулгахаар болж, албаны хүн болон ААН-ийн удирдлага хооронд маргаан дэгдэв

Сүхбаатар дүүргийн нэгдүгээр хорооны нутагт дэвсгэрт хуучнаар Ленин клубийн ар талд барьж буй барилга байгууламжийг өнөөдөр/2025.05.09/ албадан буулгахаар болж, албаны хүн болон ААН-ийн удирдлага хооронд маргаан дэгдэв.

НЗДТГ-ын дарга Д.Амгалан: Тус газрын эрхийг цуцалж, нийслэлийн өөрийн мэдэлд тухайн газрыг авсан. Зөвшөөрөлгүй барьсан барилга байгууламжийг буулгах тухай нийслэлийн Засаг даргын захирамж 2025 оны тавдугаар сарын 1-нд гарсныг та нар мэдэж байгаа. Хоёр захирамжийн биелэлтийг өнөөдөр гүйцэтгэнэ.

Нийслэлийн Засаг дарга "Оргил МГЛ" компанийнхантай уулзаад тохиролцож, ойлголцож захирамжуудаа гаргасан гэсэн мэдээлэлтэй байна. Барилга байгууламжийг барих зөвшөөрөлгүй учраас буулгана. Бусдын эзэмшил, ашиглалтын газартай давхардуулан олгосон хууль бус захирамжийг тавдугаар сарын 7-ны өдөр хүчингүй болгосон байгаа. Захирамжтайгаа танилц. Нийслэлийн Засаг даргын захирамжийг хуульд заасны дагуу иргэн, ААН биелүүлэх үүрэгтэй байгаа.

"Оргил МГЛ" ХХК-ийн захирал: Манай компанитай нийслэлээс зүгээс уулзаагүй. Буулгалтын компанийн хүнээр холбогдож ярьж байна. Төрийн байгууллага нь буулгалтын хувийн компанитай харьцдаг болчихсон юмуу ойлгохгүй байгаа. Албан тоот нь өчигдөр л ирсэн.

Амралтын өдрөөр, албан бичиг нь ирээгүй байхад хувийн буулгалтын компанийн хүмүүсийг хашаа давуулаад оруулчихсан барилга дээрх зүйлсийг зөөлгөөд буулгаж байгаа юм. Буулгалтын компанийн хүн нь Газрын албаны хүмүүсийг дуудсаны дагуу ирдэг. Жишээ нь "Маргааш нийслэлээс хүмүүс ирэх гэж байна, та нарыг дуудсан" гэж буулгалтын компанийн хүн бидэнд өчигдөр хэлсэн. ААН-ийн утас байхад яагаад оффис дээрээ дуудаж уулзахгүй байгаа юм.

"Оргил МГЛ" ХХК-ийн өмгөөлөгч н.Түмэнбаяр: Газар эзэмших эрхийн гэрчилгээг цуцалсан шийдвэр "Оргил МГЛ" компанид одоогийн байдлаар ирээгүй. Газар эзэмших эрх нь дуусгавар болсон ААН-д хууль заасны дагуу 90 хоногийн хугацаанд газраа чөлөөлөх мэдэгдэл өгдөг. Харин 90 хоногийн дотор газраа чөлөөлөхгүй тохиолдолд албадлагын арга хэмжээ хэрэглэх эрхзүйн үндэслэл бүрддэг.

Хоёрдугаарт зөвшөөрөлгүй барилга байгууламж гэж ярьж байна. 2020 онд Хот байгуулалт, төлөвлөлтийн газрын дарга Тулга гэдэг хүний тушаалаар олгогдсон барилгын ажлын зөвшөөрлийн гэрчилгээ өнөөдрийг хүртэл хүчинтэй байгаа. Гэтэл гэрчилгээг хүчингүй болгосон талаар "Оргил МГЛ" компанид мэдэгдсэн процесс явагдаагүй.

Тавдугаар сарын 7-нд газар эзэмших гэрчилгээг цуцалсан шийдвэр гарсан бол Газрын тухай хуулийн 56, 57-д заасны дагуу 90 хоногийн хугацаанд газар чөлөөлөх процесс явагдах ёстой. Үүний дараа албадан чөлөөлөх процесс явагдах хуультай. 

НЗДТГ-ын дарга Д.Амгалан: Хуульч хүн ёсзүйтэй, үнэн ярих ёстой. 2020 онд өгсөн барилгын зөвшөөрөл хүчингүй болсон гурван шатны шүүхийн шийдвэр гарсан байгаа. Барилгын тухай хуулийн 35.1.7-д заасны дагуу зөвшөөрөлгүй барилга байгууламжийг албадан буулгах захирамж тавдугаар сарын 1-нд гарсан тул буулгана.

Та бүхэн тавдугаар сарын 1-нээс хойш төрийн үйл ажиллагаанд саад учруулж, эсэргүүцэл үзүүлж байгаа.

"Оргил МГЛ" ХХК-ийн захирал: ОХУ-ын талтай газрын маргаантай байгаа тул манай барилгын ажлыг түр түдгэлзүүлсэн. Энэхүү барилгын ажлыг түдгэлзүүлсэн захирамжийг цуцалж өгнө үү гэж Захиргааны хэргийн шүүхэд хандсан юм. 

НЗДТГ-ын дарга Д.Амгалан: Тэр маргаан шийдвэрлэгдсэн. ОХУ, манай улс тохиролцож нийслэл уг газрыг эзэмшихээр болсон. 

"Оргил МГЛ" ХХК-ийн захирал: Манай барилгын ажлын зөвшөөрлийг түдгэлзүүлсэн шүүхийн шийдвэрийг гаргаад ир. Ямар үндэслэлээр захирамж гаргаснаа үзүүлчих. 1-нд өгсөн хүсэлтийг 2-нд шийдчихдэг юмуу. 15 жилийн хүчинтэй газрын гэрчилгээг яахаараа цуцалдаг юм. /НЗДТГ-ын даргын биед халдав/

Ийнхүү ширүүн маргалдсаны эцэст НЗДТГ-ын дарга шүүхийн шийдвэрийг уншиж танилцуулан, цагдаа дуудаж, "Барилгыг албадан буулгах ажлыг эхлүүлнэ" гэж мэдэгдэв.