Б.Түвшин: Байгууллагаас төлдөг НДШ-ийн хэмжээг хөдөлмөр хөлсний доод хэмжээг 10 дахин нэмэгдүүлснээр гэж хязгаар тогтооно

Гэрэл зургийг MPA агентлагийн онцгой зөвшөөрөлтэйгөөр ашиглав

УИХ-ын 40 гаруй гишүүний санаачилсан Нийгмийн даатгалын ерөнхий хуульд нэмэлт, өөрчлөлт оруулах тухай хуулийн төслийг УИХ-ын даргад өнөөдөр өргөн барилаа. 

Үргэлжлүүлэн тус хуулийн төсөлд ямар нэмэлт, өөрчлөлт оруулах талаар гишүүдийн төлөөлөл мэдээлэл өгөв. УИХ-ын гишүүн Б.Түвшин "Энэхүү өөрчлөлт нь эдийн засгийн хямралын үед ажлын байрыг нэмэгдүүлэх, иргэдийн бодит орлогыг нэмэгдүүлэх, ажил олгогчийг ажлын байраа нэмэгдүүлэх сэдлийг нь хангах гэсэн үндсэн гурван заалттай. 

Нийгмийн даатгалын ерөнхий хууль дээрх зохицуулалтаас иргэний хуулийн зохицуулалтын хөдөлмөрийн шинж чанартай зүйлээс албан журмын нийгмийн даатгал авдгийг болиулъя гэсэн санаа байгаа. Иргэн ажил хөдөлмөр гүйцэтгэхдээ орлогоосоо 20 хүртэлх хувийн нийгмийн даатгал төлж байгаа нь ажилгүйдлийг ихэсгэх, ажлын байрны үр ашгийг багасгах арга хэмжээ болж байна гэж үзээд хассан. 

Хоёрдугаарт хоол, унаа, байрны ашиглалтын зардал зэргээс нийгмийн даатгалын шимтгэл авахаа болих зохицуулалт оруулж ирсэн. Гуравдугаарт аж ахуйн нэгж, байгууллагаас төлдөг нийгмийн даатгалын хэмжээг хөдөлмөр хөлсний доод хэмжээг 10 дахин нэмэгдүүлснээр гэж хязгаар тогтооно" гэв. 

Харин УИХ-ын гишүүн П.Ганзориг "Хувийн хэвшил татвар, зээлийн хүүгийн дарамт гэсэн хүнд нөхцөлд үйл ажиллагаа явуулж байгаа. Засгийн газрын үйл ажиллагааны мөрийн хөтөлбөрт эдийн засгийн либералчлах, бизнесийн орчныг таатай болгох гэсэн тодорхой зорилтууд орсон. Үүний хүрээнд ажил олгогчийн төлдөг нийгмийн даатгалын шимтгэлийг хөнгөлж байгаа. Цалингаас бусад төрлөөс нийгмийн даатгалын шимтгэл давхар авдаг байсныг болиулж байгаа. 

Сүүлийн гурван жилийн хугацаанд хувийн хэвшлийн төрд төлөх татварын өр гурав дахин өссөн. 1.2 их наяд төгрөгийн татварын өртэй байсан бол өнөөдөр 4 их наяд төгрөг болсон. Ийм байдлаар хувийн хэвшил татвараа төлж чадахгүй байдалд орвол олон компани хаалгаа барина" хэмээн ярилаа.

Үргэлжлүүлэн УИХ-ын гишүүн О.Номинчимэг "Хөдөлмөрийн зах зээл дээрх хөдөлмөрлөх хүчний оролцоо нь 67 хувьтай байгаа. Манай урд хөрш 69 хувьтай байдаг. Тоон үзүүлэлтээр харвал бид дахиад 100 мянган хүнийг хөдөлмөрийн зах зээлд оруулах боломжтой гэж харагдаж байгаа. 

Хөдөлмөрлөх хүчин байхгүй болчихсон байна, гаднаас авах ёстой гэж ярьдаг. Гэтэл бид 40 мянган залуусаа Солонгос улсад ажиллуулахаар явуулчхаад оронд нь шууд ажиллах хүчин авна гэдэг оновчтой хөгжлийн бодлого биш. 

Одоо байгаа нөөц бололцоо, хөдөлмөрлөх орчин, ур чадварыг яаж сайжруулж дотоодын хөдөлмөрлөх зах зээлийг хэрхэн тэлэх вэ гэдэгт энэ хууль чухал ач холбогдолтой. Оюутан залуус, тэтгэвэртээ гарсан ахмад, гэртээ хүүхдээ харж байгаа эмэгтэйчүүд иргэний хуулийн хөлсөөр ажиллах гэрээгээр ажилласнаар авдаг нийгмийн даатгалын шимтгэл байхгүй болгоно" гэв.