"Донорын тухай хуулийн шинэчилсэн найруулгын нийтийн хэлэлцүүлэг явж байгаа"

Гэрэл зургийг MPA агентлагийн онцгой зөвшөөрөлтэйгөөр ашиглав

Бөөр шилжүүлэн суулгах үндэсний багаас өнөөдөр хэвлэлийн бага хурал хийж, бодит байдлын талаар өөрсдийн байр сууриа илэрхийллээ.   

Монгол Улс 1996 оноос хойш бөөр шилжүүлэн суулгах мэс заслын хүрээнд 10 жилийн турш боловсон хүчнээ бэлтгэн лабораторитой болж, 2006 оноос бөөр шилжүүлэн суулгах мэс заслыг амжилттай хийж эхэлсэн байна. Өнөөдрийн байдлаар бөөр шилжүүлэн суулгах 400 дэх хагалгаагаа хийх гэж байгаа нь томоохон дэвшил, үүнд П.Батчулуун эмч онцгой хувь нэмрээ оруулсан юм гэдгийг Бөөр шилжүүлэн суулгах үндэсний багийн зөвлөх эмч Д.Нямсүрэн онцлов. 

Бөөр шилжүүлэн суулгах үндэсний багийн гишүүн мэс заслын эмч Д.Баян-Өндөр "2000 онд Донорын хууль батлагдсанаас хойш хоёр удаа шинэчлэн найруулж баталсан байдаг. Уг хуулийг батлуулах явцад П.Батчулуун эмчийн баг манлайлан оролцож байсан. Одоо Донорын тухай хууль ахин шинэчлэгдэхээр нийтийн хэлэлцүүлэг нь явж байгаа юм. Хүн бүр тус хуульд саналаа өгөх бүрэн эрхтэй. 

Шинэчилсэн найруулгын 23.1-т амьгүй донорын гэр бүлд олгож болох тэтгэмжийг нийгмийн даатгалын шимтгэл төлсөн эсэхийг хамаарахгүйгээр хөдөлмөрийн хөлсний доод хэмжээг 10 дахин нэмэгдүүлсэн тэтгэмжийг олгоно гэсэн заалт байгаа юм. Одоо үүсээд байгаа нөхцөл байдал нь үүнтэй л холбоотой юм. Ойлголцлын зөрүү гарсан.

Эмнэлгийн мэргэжилтэн өдөр бүр өвчтөнтэйгөө уулзаж ямар эмчилгээг ямар аргаар хийх, гарах хүндрэл, цаашдаа яах, үе шат зэргийг тайлбарлаж, хоёр тал зөвшилцөөд гарын үсэг зурдаг. Энэ зөвшөөрлийн хуудсыг мэс засал хийхэд, мэдээгүйжүүлэхэд, цус сэлбэхэд ч авна. Гэтэл энэ бүрэн бөглөгдсөн зөвшөөрлийн хуудас эргээд эмчийгээ хамгаалахгүй байна гэж харж байна. 

Эмнэлгийн мэргэжилтний эрхзүйн байдлын тухай хууль нийтээр хэлэлцүүлэх түвшиндээ явж байгаа юм байна. 20 гаран зүйл ангитай хууль батлагдах гэж байна. Энэ хууль батлагдахаас өмнө ийм үйл явдал болсон нь үнэхээр харамсалтай. Эмч нар бид эрхтэн шилжүүлэн суулгах ажлын төлөө 30-аад жил ажиллахдаа эрхтэн суулгуулж байгаа хүмүүс, Донорын хууль, өвчтөнүүдийнхээ дархлаа дарангуйлах эмийг яаж үнэгүй олгох тухай, мэс заслыг нь төлбөргүй болгох тухай асуудлаар хичээн ажилласан ч өөрсдийнхөө эрх ашгийг огт бодоогүй юм байна. Эмч нар эргээд өөрсдөө асуудалд орох хэмжээнд хүрчихсэн байгаа юм байна" гэв.