"Элэг, бөөр, шөрмөсийг дэлхийд батлагдсан аргачлалаар авдаг. Иймд гурав дахь шатны шүүх дээр мэргэжлийн зөвлөл оруулахыг хүсэж байна"

Гэрэл зургийг MPA агентлагийн онцгой зөвшөөрөлтэйгөөр ашиглав

Бөөр шилжүүлэн суулгах үндэсний багаас өнөөдөр хэвлэлийн бага хурал хийж, бодит байдлын талаар өөрсдийн байр сууриа илэрхийллээ.  

Хүндэт зөвлөх эмч Л.Жамбалжав "Эд, эрхтэн шилжүүлэн суулгах үйл ажиллагааг багаараа хийдэг. Олон хүний хөдөлмөр ордог ажил юм. Эрхтэн шилжүүлэхийн тулд тархи нь үхэжсэн амьгүй донорыг хайж олох, дараа нь донорыг бэлдэх, мэс заслын баг өвчтөнд суулгах, дараа нь эмчилгээ хийх, эмнэлгээс гарсны дараагаар нь хяналтын баг ажилладаг. П.Батчулуун эмч бол донор олох, холбож өгөх үүрэгтэй хүн юм. 

2008 оны үед хамгийн анх тархи нь үхэжсэн амьгүй донороос эрхтэн авах хагалгааг хийж байсан юм. Тэр үед Гэмтлийн эмнэлэг дээр 26 настай эмэгтэйн тархи бяцарч гэмтсэний улмаас үхэжсэн, найдлагагүй гэж эмч нар тогтоосон байсан. Бид энэ тухай мэдээг аваад ар гэрийнхэнтэй нь очиж уулзаад найдлагагүй болсон тухайг нь хэлж, эрхтнийг нь авч хоёр өвчтөнд суулгуулмаар байгаа тухай хэлсэн. Ар гэрийнхэн нь маш их цочирдож хүлээж авсан ч бид 2, 3 цагийн турш ярилцсаны эцэст ойлгож хүлээн авч байсан юм. Анхны хагалгааны түүх ийм байв.

Тэр үед хагалгаа хийдэг эмч нар өөрсдөө донороо хайж олдог байлаа. Солонгос, Америк зэрэг орнуудад донор хайх ажлыг тусгай төрийн бус байгууллагууд гүйцэтгэдэг. Бид хэдэн жилийн өмнөөс л үүнийг сайн зохион байгуулалтад оруулах ёстой тухай ярьж, донор хайж олж байгаа хүмүүс болон донор хүлээж байгаа хүмүүстэй эрхтэн суулгаж буй мэс заслын баг холбогдох ёсгүй. Ямар ч хамааралгүй байх ёстой гэсэн зохион байгуулалтыг хийж, Эрүүл мэндийн хөгжлийн төвийн дэргэд Эс, эд, эрхтэн шилжүүлэн суулгах албыг байгуулсан юм. Энэ байгууллагыг П.Батчулуун эмч зохицуулан ажилладаг юм. Иймд энэ үйл явц хагалгаанд орж байгаа өвчтөн болон хагалгааг хийж буй эмч нартай ямар ч холбоо байхгүй юм. Зөвхөн донор олох үүргээ л гүйцэтгэж буй ажил юм. 

Гадуур "Энэ эмч хүний эртхэнийг зөвшөөрөлгүй аваад хүнд суулгачихсан" гэж л яриад байна. Зөвшөөрөлгүй аваагүй, хүнд суулгасан хүн нь ч биш юм. Эрхтэн шилжүүлэн суулгах энэ албаны толгой нь болсон П.Батчулуун эмчид ямар ч буруу байхгүй. Би хуулийг шүүмжлэхгүй. Харин зөв шийдэхэд нь туслахын тулд мэргэжлийн зөвлөлүүд оролцох ёстой байх. Гурав дахь шатны шүүх хурал дээр мэргэжлийн зөвлөлөөр орж, дахин сайн анхаарч үзээсэй гэж хүсэж байгаа юм. 

Түүнчлэн энэ хүний биеийн байдал таагүй байна. Зүрхний зургаан судсанд нь цус гүйлгэх гуурс байгаа. Хоригдсоноосоо хойш ахиад нэг гуурс тавиулсан байна. Хэрэв цус гүйхээ боливол зүрх нь зогсоно. Ийм хүнд нөхцөлд шүүх хурлаас өмнө энэ хүнийг чөлөөлөөсэй гэж хүсэж байна" гэв.