АНУ-д импортлох бүх ган, хөнгөн цагаанд 25 хувийн татвар оногдуулах болсныг ерөнхийлөгч Трамп зарлав

АНУ-д импортлох бүх ган, хөнгөн цагаанд 25 хувийн татвар оногдуулахаар бэлдэж байгааг тус улсын ерөнхийлөгч Дональд Трамп өчигдөр зарлажээ.

Мөн бусад төрлийн бараа бүтээгдэхүүнд оноох татварыг долоо хоногийн дундуур зарлахаа мэдэгдсэн байна.

“АНУ-д орж ирэх бүх ган 25 хувийн импортын татвартай болно” гэж тэр Ням гарагт NFL лигийн Супер Боул тоглолтыг үзэхээр Флоридагаас Нью-Орлеанс руу нисэхдээ сэтгүүлчдэд хэлжээ.

Хөнгөн цагааны талаар асуухад Трамп “хөнгөн цагаанд ч бас хамаатай” гэж хариулсан юм.

Трамп бас АНУ-ын бараа бүтээгдэхүүнд импортын өндөр татвар оноодог улсуудын эсрэг ижил төстэй хариу арга хэмжээг Мягмар, Лхагва гаригуудын аль нэгэнд зарлах тухай энэ үеэр мэдэгджээ.

“Хэрвээ тэд биднээс 130 хувийн татвар аваад бид хариуд нь юу ч авдаггүй бол цаашдаа ингэхийг зөвшөөрөхгүй” гэж тэр хэлсэн юм.

Сүүлд Супер Боулын тэмцээн эхлэхийн өмнө Fox News сувагт ярилцлага өгөхдөө Трамп хойд хөрш Канад улсыг АНУ-ын 51 дэх муж болгох санаагаа дахин илэрхийлжээ.

“Бид Канадтай хийдэг худалдаандаа жил бүр $200 тэрбумын алдагдал хүлээдэг тул АНУ-ын 51 дэх муж байх нь хамаагүй дээр гэж би бодож байна. Яагаад бид жил бүр $200 тэрбумын татаас Канадад төлдөг юм бэ? Би үүнийг зөвшөөрөхгүй” гэж тэр ярьсан байна.

Байгалийн их баялагтай Канад улс газрын тос зэрэг бүтээгдэхүүнийг АНУ-д зах зээлийн нөхцөлөөр нийлүүлдэг. Ингэхдээ АНУ-ын засаг захиргаанаас ямар нэг татаас авдаггүй юм.

Сүүлийн жилүүдэд хоёр улсын худалдааны тэнцвэр алдагдаж, 2023 онд Канадын талд $72 тэрбумын ашигтай гарсныг албаны тоо баримт харуулж байна. Энэ нь голдуу АНУ-ын эрчим хүчний импортоос болж байжээ.

Трамп өчигдөр Супер Боулын тэмцээнийг бүрэн эрхийн хугацаандаа биечлэн үзсэн АНУ-ын анхны ерөнхийлөгч болсон юм.

 

Тэрбээр Нью-Орлеанс руу нисэх замдаа онгоцонд хоёрдугаар сарын 9-ний өдрийг Мексикийн буланг “Америкийн Булан” болгон нэрлэсэн түүхэн өдөр болгох захирамжид гарын үсэг зуржээ.

Энэ үеэр тэр яг Мексикийн булангийн дээгүүр нисэж явсан юм.

Эх сурвалж: Reuters