-Азербайжан улсын Баку хотоос iKon.mn сайтын сэтгүүлч П.Сайнжаргал мэдээлж байна-

Нэгдсэн Үндэстний Байгууллага (НҮБ)-ын Уур амьсгалын өөрчлөлтийн суурь конвенцын талуудын 29 дүгээр бага хурлыг (COP 29) Азербайжан улсын Баку хотод арваннэгдүгээр сарын 11-22-ны өдрүүдэд зохион байгуулж байна. 

Энэ удаагийн бага хурал "Ногоон дэлхий ертөнцийн төлөөх эв нэгдэл" сэдвийн хүрээнд үргэлжилж байгаагаар онцлог. 

Тус хуралд улс орнуудын төрийн тэргүүн, салбарын сайд, энэ чиглэлээр үйл ажиллагаа явуулдаг хувийн хэвшил, иргэний нийгмийн байгууллагууд, энгийн иргэдийн төлөөлөл зэрэг 40,000 гаруй хүн оролцож буй талаар мэдээлэл бий. 

Дэлхийн өнцөг булан бүрээс ирсэн хүмүүс нэг зорилгын төлөө санал бодлоо илэрхийлж, ийнхүү гарц шийдлийг хэлэлцэж байна. Тэгвэл COP 29 хуралдаанаас гарах үр дүн ба уур амьсгалын өөрчлөлтийн тухайд тэдний үзэл бодлыг тодруулснаа хүргэе. 

Мөн Монгол орны байгаль орчин, уур амьсгалын талаарх тэдний төсөөлөл ямар байгааг тодрууллаа. 

"Магадгүй дулааны улиралдаа хэт халж, уур амьсгалын өөрчлөлтийн нөлөөгөөр цас хайлж байгаа байх"

Канадын иргэн Сади Декосте "Миний хувьд (COP)-ын хуралд тав дахь удаагаа оролцож байна. 

Уур амьсгалын өөрчлөлтийн нөлөө байршил үл харгалзан дэлхий даяар мэдрэгдэж байгаа болов уу. Гэхдээ сөрөг нөлөөллийг зүгээр хараад суух бус улс орнууд үүрэг хариуцлагынхаа хүрээнд үүссэн нөхцөл байдалд хамтран хариу арга хэмжээ авах нь зөв алхам болно. 

Эх дэлхийн өмнө тулгарч буй байгаль орчны асуудал, сорилт хүн болгонд хамааралтай. Энэ хүрээнд НҮБ-ын Уур амьсгалын өөрчлөлтийн суурь конвенцын талуудын бага хурал жил бүр уламжлал болгон явагдаж буй.

Улс орнууд өөрт тулгамдсан байгаль орчин, уур амьсгалын өөрчлөлтийн эсрэг хариу арга хэмжээ авах зорилгоор санхүүжилт татдагаараа COP 29-ийн ач холбогдол оршино. Ингэхдээ үүссэн сөрөг нөлөөг хэрхэн багасгах, ямар бодлого хэрэгжүүлж даван туулах зэргээр амбицтай амлалт өгч, шийдлийг танилцуулдаг. 

Тухайлбал хөрсний бохирдол дэлхийн улс орнуудад тулгарч буй бодит бэрхшээл. Тиймээс энэ чиглэлд санхүүжилтээ нэмэгдүүлэх нь нэн тэргүүний ажил.

Монгол оронд ч дээр дурдсан уур амьсгалын асуудал тулгарч байгаа болов уу. Хэдийгээр би очиж үзээгүй ч миний төсөөллөөр өвөлдөө хүйтэн эрс тэс уур амьсгалтай, өргөн уудам газар нутагтай, ан амьтан, мал сүргээр баялаг нутаг байх.

Магадгүй уур амьсгалын өөрчлөлтийн нөлөөгөөр цас хайлж, дулааны улиралдаа хэт халалт явагдаж байгаа байх. Үүний үр нөлөө нүүдэлчин малчид, фермийн аж ахуй эрхэлдэг хүмүүст хамгийн түрүүнд мэдрэгдэж байгаа гэж бодож байна" гэлээ

"Температурын нөлөө, дэлхий дулаарал хэт мэдрэгдэх боллоо"

Уганда улсын иргэн Soshua "Энэхүү хуралд хоёр дахь удаагаа оролцохоор Африкийн Уганда улсаас ирсэн. Өмнө нь Дубайд зохион байгуулагдсан COP-ын хуралд оролцож байсан. 

Үнэнийг хэлэхэд соёлын олон янз байдалтай танилцах, шинэ хүмүүстэй харилцаа холбоо тогтоох боломжийг олгодог хурал. Сүүлийн жилүүдэд манай улсад хэт халалт маш их мэдрэгдэж байна. Гэхдээ цөөн хэдэн улсаар хязгаарлагдахгүй дэлхий нийтийн өмнө тулгарч буй асуудал бол температурын нөлөө, дулаарал. Энэ бүхэнд гарц шийдэл хайж, хариу арга хэмжээ авах нь зүйтэй. 

Монголын тухайд яривал Чингис хааны нэр л санаанд бууж байна. Үүнээс өөр мэдээлэл алга. 

Үнэнийг хэлэхэд Монгол ямар цаг ууртай, ямар газар байдгийг сайн мэдэхгүй, очиж үзэж байгаагүй. Бусад орнуудтай л адил уур амьсгалын өөрчлөлтийн нөлөө мэдрэгдэж байгаа байх" гэлээ. 

"Заримдаа Монгол шиг хүйтэн цаг агаар бидэнд ч хэрэгтэй байдаг"

Индонез улсын иргэн Ластиана Юлиандори "НҮБ-ын Уур амьсгалын өөрчлөлтийн суурь конвенцын талуудын 29 дүгээр бага хуралд анх удаа оролцож байна. 

Цаг уурын өөрчлөлт нь бүх улс орны өмнө тулгамдаж буй томоохон асуудал. Тэгвэл байгаль, цаг уурын гэнэтийн сорилтод дэлхийн бусад улс хэрхэн хандаж, ямар гарц гаргалгааг эрэлхийлж байгааг мэдэхийг хүссэн учраас оролцохоор Индонез улсаас ирсэн. 

Манай улсын иргэд хувьдаа жижигхэн фермийн аж ахуй эрхлэх нь түгээмэл. Сүүлийн жилүүдэд уур амьсгалын өөрчлөлтийн нөлөө хөдөө аж ахуйн салбарт ихээхэн сөрөг нөлөөллийг үзүүлэх боллоо. Гэвч үүссэн асуудлыг даван туулахад хангалттай нөөц боломж байдаггүй, хязгаарлагдмал. Үүнтэй адилаар Монгол ч бас өөрийн гэсэн сорилт тулгарч буй байх. 

Монголын талаар сайн мэдэх зүйл байхгүй ч цастай, маш хүйтэн цаг агаартай гэдгээр төсөөлөлд бууж байна. Заримдаа ийм хүйтэн уур амьсгал бидэнд ч хэрэгтэй байдаг. Монголчууд байгальтайгаа ойр, тайван орчинд амьдардаг хүмүүс болов уу" гэлээ.