Зургаадугаар сарын 1-ний өдөр 08:00-19:00 цаг хүртэл хаагдах авто замууд

Олон улсын хүүхдийн эрхийг хамгаалах өдрийг тохиолдуулан НЗДТГ-аас “Монгол хүүхдүүд 2025” нэгдсэн арга хэмжээг Д.Сүхбаатарын талбайд зургаадугаар сарын 1-ний Ням гарагт зохион байгуулна. Энэ жил уг арга хэмжээг карнивал хэлбэрээр зохион байгуулж байгаагаараа онцлогтой.

Төв талбайг “Үндэсний өв соёл”, “Шинжлэх ухаан, танин мэдэхүй”, “Эрүүл мэнд, хүүхдийн эрх”, “Боловсрол, хотын соёл”, “Соёл, урлаг”, “Ирээдүйн Улаанбаатар” зэрэг үндсэн зургаан бүлэг, 60 асар бүхий хотхоны төлөвлөлтөөр зохион байгуулна.

МУГЖ Т.Ариунаа, МУСГЗ С.Баттулга, рэппер ThunderZ, охидын Wasabies хамтлаг, Foux хамтлаг, дуучин Davaidasha, Becca, Лууяа, Мичидмаа, Уянгадарь, Монголын Хүүхдийн ордны уран бүтээлчид, “Улаан бүч” чуулгын найрал дуучид, “Мөнх Тунх” зэрэг 300 гаруй уран бүтээлч 11:00-13:00 цагийн хооронд тоглолтоо толилуулна.

Баярын арга хэмжээний үеэр 08:00-19:00 цагийн хооронд дараах гудамж авто замыг хаана. Тодруулбал,

• Монголын хүүхдийн ордны уулзвараас Шангри Ла төв хүртэл (Гэндэнгийн гудамж)
   
• Хүмүүнлэгийн ухааны их сургуулийн уулзвараас Централ тауэрийн урд уулзвар хүртэл (Их сургуулийн гудамж)
   
• Чингис хаан музейн уулзвараас Төв шуудангийн уулзвар хүртэл (Чингисийн гудамж)
   
• Ус, цаг уурын хүрээлэнгээс Төрийн ордны баруун талын уулзвар хүртэл (Жуулчдын гудамж)
   
• “Галерей” худалдааны төвөөс Спортын төв ордон хүртэл (Амарын гудамж) замыг хаах юм.

Арга хэмжээний үеэр “Хүүхдийн ертөнц” парад, “Magic Mascot” энтертайнментийн Уолт Диснейн үлгэрийн баатруудын “Magic Dream” парад болох тул зарим гудамж замын хөдөлгөөнийг түр хязгаарлана.

“Хүүхдийн ертөнц” парадын маршрут:

10:00-12:00 цагийн хооронд Монголын хүүхдийн ордноос Сүхбаатарын талбайг нар зөв тойроод эхэлсэн цэг хүртэл.

 

“Magic Dream” парадын маршрут:

Нэгдүгээр тойрог: 10:30-12:00 цагийн хооронд “Наадам центр” худалдаа, үйлчилгээний төвөөс Сүхбаатарын талбай хүртэл;

Хоёрдугаар тойрог: 13:00-14:30 цагийн хооронд Сүхбаатарын талбайн баруун урд талаас Сүхбаатарын талбайн зүүн урд тал хүртэл явна.