Б.Оюунсанаа: Улс орнууд экосистемээ нөхөн сэргээж, байгалиа унаган төрх рүү нь дөхүүлэхийг эн тэргүүнд эрэмбэлж байна

- Азербайжан улсын Баку хотоос iKon.mn сайтын сэтгүүлч П.Сайнжаргал мэдээлж байна -

Азербайжан улсад эхэлсэн уур амьсгалын өөрчлөлтийн асуудлаарх 29 дүгээр бага хуралд манай улсын төлөөлөл оролцож байна.  

Тус хуралд улс орнуудын төрийн тэргүүн, салбарын сайд, энэ чиглэлээр үйл ажиллагаа явуулдаг хувийн хэвшлийн байгууллагууд, иргэний нийгмийн байгууллагын төлөөллүүд, иргэд зэрэг нийт 40,000 гаруй хүн оролцож байгаа аж. 

Энэ талаар Ойн газрын дарга Б.Оюунсанаа "Уур амьсгалын өөрчлөлтийн тухай Нэгдсэн Үндэстний Байгууллагын суурь конвенцын талуудын тогтолцооны асуудал 1994 оноос хойш эхэлсэн.

Улс орнууд үйлдвэрлэлийн болон бусад төрлийн хүчин зүйлээс шалтгаалах уур амьсгалын өөрчлөлтийн эсрэг арга хэмжээ авахаар амлалт өгч, хэрэгжүүлэхийг зорьж ажилладаг.

Эх газрын уур амьсгалтай улс орнууд температурын өөрчлөлтөд илүү эмзэг, өртөмхий. Тэр дундаа манай улсын уур амьсгалын температурын өсөлт дэлхийн дунджаас бараг гурав дахин илүү хурдтайгаар өөрчлөгдөж буй онцлогтой.

Сүүлийн 30 гаруй жилд дэлхийн хэмжээнд 10 сая га орчим талбай ой доройтсон гэсэн тооцоо бий. Өөрөөр хэлбэл Солонгос улсын нутаг дэвсгэртэй дүйцэх талбай доройтож байна гэсэн үг.

Ойн салбарт уур амьсгалын өөрчлөлт хэрхэн нөлөөлж байгааг харуулж байгаа юм. Үүний эсрэг маш олон оролдлогуудыг хийж байна. Нэг жишээ нь ногооруулах буюу мод тарьж ургуулах явдал" гэлээ. 

Мөн "Монгол Улсын ерөнхийлөгчийн санаачилгаар “Тэрбум мод” тарьж ургуулах ажлыг зохион байгуулж байгаа. 

Үүний ижил Пакистан улс 10 тэрбум мод, Европийн Холбоо гэхэд гурван тэрбум мод, БНХАУ сүүлийн 60 жилийн хугацаанд 70 гаруй тэрбум модыг ургуулж байна. 

Түүнчлэн манай орон сүүлийн 30 жилийн хугацаанд хөнөөлт шавж болон түймрийн улмаас 1.6 сая га орчим талбай доройтсон. Тиймээс дэлхий нийтээрээ хийж буй нэн тэргүүний ажил доройтсон ойгоо нөхөн сэргээх юм. Ингэхдээ байгальд суурилсан шийдэл буюу байгалийн өгөгдөл бүхий онцлогийг харгалзаж, мод суулгаж, тэлэх байдлаар ойг нөхөн сэргээнэ.

Өмнө нь хэдэн мянган жил мод ургаагүй газарт мод ургуулах нь хүндрэлтэй. Тиймээс одоогийн экосистемийг нөхөн сэргээж, буцаагаад унаган төрх рүү нь дөхүүлэх тухай асуудал нэн тэргүүн эрэмбэлэгдэж байгаа" хэмээв.