Т.Баярхүү: Цаг агаар хуурайшилттай байгаа учраас иргэдийг ногоон бүсэд зорчихыг хориглож, хяналт тавьж байгаа

Гэрэл зургийг MPA агентлагийн онцгой зөвшөөрөлтэйгөөр ашиглав

Ой хээрийн түймрийн нөхцөл байдлын талаар Улсын Онцгой комисс (УОК)-ын нарийн бичгийн дарга, хурандаа Т.Баярхүү, Онцгой Байдлын Ерөнхий газар (ОБЕГ)-ын Гал түймэртэй тэмцэх хэлтсийн дарга, хурандаа Ц.Нямбаяр нар өнөөдөр мэдээлэл хийлээ.

УОК-ын нарийн бичгийн дарга, хурандаа Т.Баярхүү “Сүүлийн 10 хоногт Дорнод, Сэлэнгэ, Төв, Хөвсгөл, Хэнтий аймгуудад нийт 10 удаагийн ой хээрийн түймэр гарч, тавыг нь бүрэн унтрааж, гурвыг нь цурамд оруулсан байна. Мөн Сэлэнгэ, Хэнтий аймгуудад хоёр түймрийг унтраах ажиллагаа үргэлжилж байгаа бөгөөд эдгээр түймрүүдэд автомашин техник хэрэгсэл очих боломжгүй, бартаа саадтай алслагдсан бүс нутагт гарч байна. Тиймээс онцгой байдлын алба хаагчид, мэргэжлийн байгууллагууд нисдэг тэрэг ашиглан хүч хэрэгслийг зөөвөрлөн ажиллаж байгаа юм.

Цаг агаар хуурайшилттай байгаа учраас онцгой байдлын байгууллагаас ногоон бүсэд зорчихыг хориглож, хяналт тавих арга хэмжээнүүдийг авч хэрэгжүүлж байна. Энэ нөхцөл байдлыг хүндэтгэн, иргэдэд зөвлөмж өгч байгаа бөгөөд гал түймрийн аюулаас сэргийлэхийн тулд мэргэжлийн байгууллагын зөвлөмжийг дагахыг анхааруулж байна.

Мөн ойн бүсүүдэд түймрийн эрсдэл өндөр байгаа тул тэнд зорчихдоо аюулгүй байдлаа хангаж, галын аюулгүй байдлын зөвлөмжийг сайтар дагах хэрэгтэй“ гэдгийг онцоллоо.

Үргэлжлүүлж ОБЕГ-ын гал түймэртэй тэмцэх хэлтсийн дарга, хурандаа Ц.Нямбаяр дараах мэдээллийг өглөө.

Тэрбээр “Орхон, Дархан, Сэлэнгэ, Төв аймгийн Онцгой байдлын алба, Үндэсний аврах бригад, Хэнтий аймгийн Онцгой байдлын газар болон байгаль орчин, эрүүл мэндийн байгууллагуудтай хамтран нийт 1,401 хүн, 27 автомашинтайгаар ажиллаж байгаа юм. Түүнчлэн 12 автомашин, нэг нисдэг тэрэг түймрийг унтраахад ашиглагдаж байна.

Эдгээр түймрүүд нь ойн бүсүүдэд гарсан тул унтраах ажиллагаа хүндрэлтэй, олон хүний хүчин чармайлт шаардсан ажил болж байгаа. Түймрийг унтраахад хүчтэй салхи, хур тунадасгүй байдал зэрэг нь хүндрэл учруулж, оройн түймэр үүсэх магадлалтай. Зарим газарт салхи 10-16 м/с хүрч, энэ нь түймрийн тархалтыг түргэсгэх эрсдэлтэй.

Хэдийгээр борооны урьдчилсан мэдээ ирсэн ч, газар дээрх нөхцөл байдал хүндэрч байна. Түймрийн шалтгаан нөхцөлийг тогтоохоор холбогдох байгууллагууд ажиллаж байгаа бөгөөд иргэдэд урьдчилан сэргийлэх арга хэмжээ авахыг, мөн галын аюулгүй байдлыг хангахыг анхааруулж байна. Тухайлбал, хаврын хуурайшилттай үед ургамлын чийгшил багассан байдалтай байгаа учир ой хээрийн түймрээс урьдчилан сэргийлэхэд иргэдийн анхаарал халамж чухал байна” гэлээ.