Хятадын банкууд Оросын төмөр замаар тээвэрлэсэн барааны төлбөрийг хүлээн авахаас татгалзаж эхэлжээ

Өрнөдийн хориг арга хэмжээний улмаас Оросын гадаад худалдаа нь дорно зүгийг чиглэсэн төмөр замын тээвэрлэлтээс ихээхэн хамааралтай болоод байгаа.

Тэгвэл Хятадын банкууд өнгөрсөн долоо хоногоос төмөр замаар тээвэрлэсэн Оросын импортын барааны төлбөрийг хүлээж авахаас ихэнхдээ татгалзаж эхэлжээ.

Үүнээс өмнө Хятадын том банкууд Оросын талын ямар ч валютаар гүйцэтгэсэн төлбөр тооцоог хүлээж авахаа эрс багасгаад байгаа. Тухайлбал зургаадугаар сард Оросоос Хятад руу хийгдсэн бүх гүйлгээнүүдийн ердөө 15 хувь амжилттай болсон байна.

Ихэнх нь гүйлгээний болон бараа бүтээгдэхүүний зориулалт, илгээгч болон хүлээн авагчийг нягтлан шалгаж буй шалтгаанаар урт хугацаанд гацаж, зарим хэсэг нь буцаагддаг болжээ.

Энэ нь Хятадын банкууд Украины дайнтай холбоотой авч хэрэгжүүлсэн Өрнөдийн хоёрдогч хориг арга хэмжээгээр шийтгүүлэхээс болгоомжилдог болсонтой холбоотой.

Тиймээс тус улсын гол дөрвөн банк (Industrial and Commercial Bank of China, Agricultural Bank of China, Bank of China, China Construction Bank) бүх гүйлгээнүүдийг нарийвчлан шалгадаг болсон юм.

Тухайлбал тэд ачааг ямар замаар тээвэрлэх чиглэл, чингэлгийн тоо, бараа ачигдсан боомтын нэр, тээвэрлэлтэд оролцогч бүх талын татвар төлөгчийн мэдээлэл зэргийг шаарддаг болсон тухай Оросын томоохон ложистикийн компанийн төлөөлөгч мэдээлжээ.

Хэрвээ энэ бүх шатанд Өрнөдийн хориг, хар жагсаалтад орсон ганц л байгууллага, хувь хүн илэрвэл төлбөрийг хүлээж авахаас татгалздаг болсон байна.

Эх сурвалж: The Moscow Times