Саудын Араб улсад анх удаа усны хувцасны загварын шоу зохион байгуулагдсан нь “түүхэн” үйл явдалд тооцогдож байна

Исламын шашны хатуу дэглэмтэй Саудын Араб улсад өчигдөр буюу  Баасан гарагт анх удаагаа усны хувцасны загварын шоу зохион байгуулагджээ.

Ердөө арав хүрэхгүй жилийн өмнө эмэгтэйчүүдэд бүх биеэ халхалсан хувцас өмсөхийг шаарддаг байсан тус улсад энэ нь “түүхэн” үйл явдал юм.

Мороккогийн загвар зохион бүтээгч Ясмина Канзалын бүтээлүүдийг Улаан тэнгисийн эргийн “Regis Red Sea Resort” амралтын газрын усан санд үзүүлжээ.

“Энэ улс маш хуучинсаг газар гэдэг нь үнэн, гэхдээ бид Арабын ертөнцийг төлөөлөх гоёмсог усны хувцаснуудыг үзүүлэхийг хичээлээ. Бид энд ирэхдээ л энэ бол Саудын Арабын хувьд түүхэн үйл явдал гэдгийг ойлгосон. Учир нь анх удаа ийм арга хэмжээ зохион байгуулагдаж байна” гэж Канзал ярьсан байна.

 

2017 онд Саудын Арабын хааны нэгдүгээр угсаа залгамжлагч болсон хунтайж Мухаммед нийгмээ шинэчлэх олон ажлыг эхлүүлээд байгаа.

Тус улс нь Исламын шашны хамгийн хатуу номлолуудын нэг Ваххабизмийг дагасаар ирсэн уламжлалтай.

Мухаммедын шинэчлэлийн үр дүнд кино театруудыг дахин нээж, эмэгтэйчүүд автомашин жолоодож, эрчүүдтэй хамт олон нийтийн арга хэмжээнүүдэд оролцдог болсон.

 

Хунтайж бас газрын тосноос хараат эдийн засгаа төрөлжүүлэхийг зорьж байгаа. Аялал жуулчлал, хувцас загварын салбарыг хөгжүүлэх зорилт үүнд нь багтаж байна.

2022 онд Саудын Арабын хувцас загварын салбарын эргэлтийн хэмжээ $12.5 тэрбумд хүрсэн нь үндэсний дотоодын нийт бүтээгдэхүүнийх нь 1.4 хувь болж байжээ. Энэ салбарт одоо 230,000 хүн ажилладаг юм байна.

Эх сурвалж: AFP