ИНФОГРАФИК: Рио Тинтогийн олон улсад төлсөн татварын хэмжээ 58 хувиар нэмэгджээ
Оюу толгой төслийн хөрөнгө оруулагч Рио Тинто групп 2021 онд үйл ажиллагаагаа явуулдаг 35 улсдаа нийт 13.3 тэрбум ам.долларын татвар, хураамж төлж, дэлхийн эдийн засагт 66 тэрбум ам.долларын шууд хувь нэмэр оруулжээ.
Page 1: Рио Тинтогийн 35 улсад төлсөн татвар /Улсаар/
Уул уурхайн салбарт дэлхийд дэд байранд бичигддэг тус группийн өнгөрсөн онд төлсөн татвар нь өмнөх жилийнхээс 58 хувиар нэмэгдсэн байна. Үүнд түүхий эдийн ханшийн өсөлт голлон нөлөөлжээ. Рио Тинтогийн нийт орлогын 70 орчим хувийг төмрийн хүдрийн бизнес нь дангаараа бүрдүүлдэг. Тус групп Австралид төмрийн хүдрийн 16 уурхай, 4 боомт, терминал, сэргээгдэх эрчим хүчний 3 станц, 1700 км үргэлжлэх төмөр зам, жолоочгүй автомат галт тэрэг ажиллуулдаг. Мөн Австралид хөнгөн цагааны 10 орчим цэвэршүүлэх, хайлуулах үйлдвэрлэл эрхлэхээс гадна давсны хэд хэдэн уурхай, очир-эрдэнийн уурхайтай, нийт ажилтнуудынх нь талаас илүү нь ажилладаг. Австрали улсад 2021 онд 11 тэрбум ам.долларын татвар төлжээ.
Харин Apple зэрэг компанийн бүтээгдэхүүнийг нийлүүлдэг, голдуу хөнгөн цагааны үйлдвэрлэл явуулдаг Канад улсад 855 сая ам.долларын татвар хураамж төлсөн байна. Рио Тинто групп нь Алкоатай хамтран хэрэгжүүлдэг ELYSIS төслийнхөө хүрээнд нүүрстөрөгч огт ялгаруулдаггүй сайн чанарын цэвэршүүлсэн хөнгөн цагааны аж үйлдвэрийн паркийг Канадын Квебек, Бритиш Колумби мужид ажиллуулдаг. Тус аж үйлдвэрийн паркийг байгальд ээлтэй байхаар шийдсэн бөгөөд эрчим хүчний шийдлээ усан цахилгаан станцаар шийдсэн гэдгээрээ онцлог юм. Мөн Диавикийн очир-эрдэнийн уурхай, титаны давхар исэл, төмрийн хүдрийн уурхайтай.
Үүнээс гадна Рио Тинто дэлхийн хамгийн том зэсийн уурхай болох Чилийн Эскондидагийн зэсийн уурхайн 30 хувийг эзэмшдэг. Эскондидагийн дийлэнхийг буюу 57.5 хувийг BHP, үлдсэн 12.5 хувийг Японы JECO консерциум эзэмшдэг. Харин менежментийг нь BHP хариуцдаг байна. Чили улс дахь үйл ажиллагаандаа Рио Тинто өнгөрсөн онд 562 сая ам.долларын татвар, хураамж төлжээ.
Зэсийн өөр нэг онцлох төсөл Монгол Улсын Засгийн газартай хамтран хэрэгжүүлдэг Оюу толгой төсөл юм. Өнгөрсөн онд Рио Тинто Монгол Улсад 544 сая ам.доллар татвар, төлбөр, хураамж төлсөн байна.
Page 2: Төлсөн татвар, борлуулалтад эзлэх хувь
Өөрөөр хэлбэл, Монгол Улсын татварын орлогын 6 төгрөг тутмын нэгийг нь Рио Тинто, Оюу толгойн татвараас бүрдүүлжээ. Оюу толгой нь 2010-2021 онуудад манай улсад нийт 3.3 тэрбум ам.долларын татвар, төлбөр, хураамж төлсөн байна. Тухайлбал, 2016 онд 215 сая ам.доллар, 2017 онд 228 сая ам.доллар, 2018 онд 308 сая ам.доллар, 2019 онд 305 сая ам.доллар, 2020 онд 277 сая ам.доллар, 2021 онд 544 сая ам.долларыг тус тус төлжээ. Зөвхөн өнгөрсөн онд төлсөн татвар нь л гэхэд бүх тэтгэврийн насныхны тэтгэвэр болон бусад тэтгэмжийг төлсөнтэй тэнцэхүйц хэмжээний дүн аж.
Page 3: Рио Тинтогийн Монгол Улсад төлсөн татвар
Дэлхийн 35 улсад үйл ажиллагаа явуулдаг Рио тинто групп нь үйл ажиллагаа явуулдаг улс, орон бүртээ хэдий хэмжээний татвар төлдөг тухайгаа ил тодоор жил бүр тогтмол тайлагнадаг. Рио Тинтогийн татвар төлөлтийн талаарх дэлгэрэнгүй мэдээлэлтэй ЭНЭ холбоосоор орж танилцана уу.
