Нийгмийн даатгалын шимтгэлийг нэмэгдүүлэх болсон шийдвэрийг МТЗ-ын ҮЭХ эсэргүүцлээ
Энэ оны нэгдүгээр сарын 1-ний өдрөөс хэрэгжиж эхэлж буй нийгмийн даатгалын шимтгэлийг нэг хувиар нэмэгдүүлэх болсон шийдвэрийг Монголын төмөр замчдын Үйлдвэрчний эвлэлийн холбоо эсэргүүцэж өнөөдөр мэдээлэл хийлээ.
Монголын төмөр замчдын Үйлдвэрчний эвлэлийн холбооны дарга Б.Баяраа "Манай байгууллага бол хөдөлмөр эрхэлж, Монголын баялгийг бүтээж буй хүмүүсийн эрх ашгийн төлөө явдаг байгууллага юм. Энэ ч утгаараа нэгдүгээр сарын нэгний өдрөөс хэрэгжиж эхэлсэн нийгмийн даатгалын шимтгэлийн хэмжээг нэг хувиар нэмэгдүүлж буй шийдвэрийг эсэргүүцэж байна.
"УБТЗ ХНН"-ийн хувьд жил бүр ажилчдынхаа цалинг нэмэгдүүлэн ажилладаг. Үүнийг дагаад нийгмийн даатгалд төлөгдөж буй шимтгэл нэмэгдэж, тэр хэмжээний мөнгийг жил бүр улсын төсөвт төвлөрүүлдэг юм.
Харин бусад цалингаа нэмэгдүүлэх бололцоогүй байгууллагад энэхүү нэг хувийн шимтгэл томоохон асуудал болж байгаа гэсэн үг. Үүнээс болж зарим хувийн аж ахуйн нэгж, байгууллага үүд хаалгаа хааж, ажилчдынхаа тоог багасгах зэрэгт хүрч байна.
Эдгээрээс гадна бид бүтэн нэг сарын ашгийн орлогоо нийт ажилчдын тоонд хувааж жилийн эцэст 13 дугаар сарын цалинг олгодог. Энэ нь дунджаар жил бүр 1,300,000 төгрөг болдог. Харин энэ жилийн хувьд УБТЗ ашигтай ажилласан тул энэхүү мөнгөн дүнг хоёр дахин нугалж өгсөн. Өөрөөр хэлбэл ийм төрлийн цалин, урамшууллын мөнгөн дүн нэмэгдхийн хэрээр мөн нийгмийн даатгалын шимтгэл татагдаж байдаг гэсэн үг.
Иймэрхүү замаар улсын баялаг бүтээж буй ажилчдын олсон орлогоос гарч буй нийгмийн даатгалын шимтгэлийн ард тодорхой зорилтот бүлэгт чиглэсэн үйл ажиллагаанд зарцуулагдахын оронд улс төрчдийн эрх мэдлээ нэмэгдүүлэх боломж болж хувираад байгааг бид эсэргүүцэж байна.
Тийм ч учраас УБТЗ-ын зүгээс 2018 онд өгч байсан нийгмийн даатгалын хэмжээгээрээ үргэлжлүүлэн төлж, нэмэгдүүлэхгүй байхыг бид хүсэж, захиргаандаа мэдэгдэх болно" гэлээ.
Шаардлагад:
"Төмөр замчдаас бүрдүүлдэг бүх төрлийн татвар, шимтгэлүүд жилээс жилд нэмэгдэн улс, нийгэмд хувь нэмрээ оруулж буй гэдэгт бид эргэлздэггүй. Харин татвар төлөгчдөөс төвлөрүүлсэн орлого нь аливаа сан, бонд тендер нэрээр төрөөс төрсөн баячууд шударга бус аргаар мөнгө олж, бизнесийн бүлэглэлийн луйврын золиос болж байгаад харамсаж байна.
Тусгай хөнгөлөлт гэх нэрийн дор алтны болон бусад төрлийн татвараас чөлөөлж, аль нэгэн этгээдэд давуу байдал бий болгон орлого алдах бусармаг үйлдлийг зогсоож, элдэв сан, бонд тендер гэх мэт далд эх үүсвэрээс олох нууц орлогуудыг ил болгох, орлогын албан татвар тогтоох зэрэг үйл ажиллагааг зохион байгуулахыг хүсэж байна.
Мөн дараах биелж болох цөөн тооны шаардлагуудыг шийдвэрлэж өгөхийг хүсжээ:
- Ард түмний нуруунд дарамт болсон ипотекийн болон бусад төрлийн банкны зээлийн хүүг бууруулах,
- Бүх насаараа хөдөлмөрлөөд тэтгэвэр тогтоолгож буй иргэдийн тэтгэврийн үнэлэмжийг сүүлийн 6,7 жилийн дунджаас хамааруулан бууруулахгүй байх,
- Нийгмийн даатгалын шимтгэл нэмэгдүүлэхийг нэн даруй зогсоох зэрэг шаардлагуудыг хүргүүлж байна" хэмээн шаарджээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
29 СЭТГЭГДЭЛТЭЙ
|
