Энхтайвны гүүрийг өргөтгөх, хүчитгэх ажлын зураг төслийг боловсруулах зөвлөх үйлчилгээнд ₮1.5 тэрбумыг зарцуулна
1958 онд БНХАУ-ын тусламжаар барьсан Энхтайвны гүүрийг энэ онд өргөтгөж, хүчитгэхээр болоод буй.
Тус гүүрийг өргөтгөх, хүчитгэх ажлын зураг, төслийг боловсруулах зөвлөх үйлчилгээний нийт төсөвт өртөг ₮1.5 тэрбум төгрөг бөгөөд энэ онд дамжуулах төсвийг 397.3 сая төгрөгөөр баталжээ.
Гүүрний зураг төсвийг боловсруулах тендерт "ДБЭТ" компани шалгараад байгаа юм.
"ДБЭТ" компанийн ерөнхий инженер Э.Тодгэрэл "Энхтайвны гүүр нь Т хэлбэрийн дам нуруу, өлгөмөл дам нуруутай бөгөөд ашиглалтын шаардлага хангахгүй буюу муу гэсэн дүгнэлт гарсан. Явган хүний зам нь доогуураа хөндий.
Гүүрэн дээгүүр суудлын автомашин, нийтийн тээврийн автобус зорчиход аюулгүй. Гүүр динамик хөдөлгөөн буюу чичиргээнд байдаг тул 30-40 тоннын даацын машин явбал дийлэхгүй, эвдэрнэ.
Уг гүүрийг ус эвдэж байна. Их засвар хийхдээ өндөр зэрэглэлийн ус тусгаарлагч угсарч, 15-20 жилийн баталгаа өгөхөөр зургийг боловсруулж байна" хэмээн мэдээлж байв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
