АНУ-д гар утсаа үйлдвэрлэхгүй бол Apple, Samsung компаниудыг 25 хувийн татвараар шийтгэх тухай Трамп мэдэгдлээ

Баасан гарагт ерөнхийлөгч Дональд Трамп гар утсаа АНУ-д үйлдвэрлээгүй тохиолдолд Apple компанийг 25 хувийн татвараар шийтгэх тухай мэдэгджээ.

“Apple-ийн Тим Күүкт би Америкт зарах iPhone гар утсаа Энэтхэг, эсвэл өөр аль нэг улсад биш, АНУ-д үйлдвэрлүүлэх хүсэлтэй байгаагаа нэлээд эрт илэрхийлж байсан. Хэрвээ энэ хэрэгжихгүй бол Apple компани АНУ-д хамгийн багадаа 25 хувийн татвар төлөх ёстой” гэж Трамп сошиал хуудсандаа бичсэн юм.

Түүний энэ мэдэгдлийн дараа Apple компанийн хувьцааны ханш 2.6 хувиар унаж, зах зээлийн үнэлгээнээс нь $70 орчим тэрбум хасагдсан байна.

Гэхдээ Apple ганцаараа ийм сүрдүүлэгтэй тулгараагүй юм. Баасан гарагийн үдээс хойш Цагаан ордонд сэтгүүлчидтэй уулзахдаа Трамп бас Samsung болон бусад гар утас үйлдвэрлэгчид компаниудад 25 хувийн татвар ногдуулахаар сүрдүүлжээ.

“Тэд үйлдвэрээ энд байгуулбал татвар төлөхгүй. Тиймээс үйлдвэрээ энд байгуулах хэрэгтэй” гэж тэр хэлсэн юм.

Өнгөрсөн сард Трампын засаг захиргаа Хятадын бараа бүтээгдэхүүний импортын татварыг 145 хувьд хүргэж өсгөсөн нь ихэнх бүтээгдэхүүнээ тэнд үйлдвэрлүүлдэг Apple компанийн хувьд том цохилт болж байв.

Гэхдээ хэдхэн хоногийн дараа Трамп уг татвараас ухаалаг гар утас, компьютерыг чөлөөлсөн юм.

Дараа нь Apple компани Трампын худалдааны дайны аюулаас зайлсхийх зорилгоор iPhone-ий ихэнх үйлдвэрлэлээ Хятадаас Энэтхэг рүү шилжүүлэхээр төлөвлөсөн тухай мэдээ тарж байв.

Гэхдээ iPhone бүтээгдэхүүнийх нь 90 орчим хувь одоо Хятадад үйлдвэрлэгддэг хэвээр байгаа тул шилжүүлэх ажил тийм амар биш юм.

Одоогоор АНУ нь iPhone гар утасны хамгийн том зах зээл бөгөөд жил бүр 60 гаруй сая хувь борлогддог байна.

Гэхдээ шинжээчид ажиллах хүч болон үйлдвэрлэл явуулах орчин нөхцөл хангалттай биш, сонголт муу шалтгаанаар АНУ-д үйлдвэрлэсэн iPhone нэлээд өндөр өртөгтэй болно гэж үздэг.

Тухайлбал Wedbrush Securitiies санхүүгийн компанийн шинжээчид АНУ-д үйлдвэрлэсэн iPhone одоогийнхоосоо гурав дахин өндөр үнэтэй болох тооцоог өнгөрсөн сард танилцуулж байжээ.

Эх сурвалж: Reuters