Өнгөрсөн сард гарсан зөрчлийн хэргийн 61 хувийг 26-45 насныхан үйлдэж шийтгэл хүртэв
Улсын хэмжээнд 2025 оны тавдугаар сард нийт 373,252 зөрчил бүртгэгдсэн бөгөөд өмнөх дөрөвдүгээр сард гарсан зөрчилтэй харьцуулахад 8.2 хувиар өссөн байна.
Нийт зөрчлийн
- 78.2 хувь нийслэлд
- 21.8 хувь нь орон нутагт бүртгэгдсэн.
Үүнээс 98.3 хувийг цагдаа, 1.7 хувийг гааль, татвар болон Гадаадын Иргэн, Харьяатын Газар, Онцгой Байдлын Ерөнхий Газар зэрэг бусад эрх бүхий байгууллага шалган шийдвэрлэжээ.
Тавдугаар сард зөрчил гаргасан 366,328 хүнд шийтгэл оногдуулсан нь өмнөх сараас 9.1 хувиар өссөн бол 1,157 хуулийн этгээдэд шийтгэл оногдуулсан нь өмнөх сараас долоон хувиар буурсан үзүүлэлттэй байна.
Шийтгэл оногдуулсан иргэний 72.4 хувь нь эрэгтэй, 27.6 хувь нь эмэгтэй бөгөөд нийт зөрчлийн 61.2 хувь нь 26-45 насныхан эзэлжээ.
Бүртгэгдсэн нийт зөрчлийг шийдвэрлэлтийн байдлаар авч үзвэл:
- 354,209 буюу 94.9 хувийг газар дээр нь
- 9,001 буюу 2.4 хувийг хялбаршуулсан журмаар
- 671 буюу 0.2 хувьд эрх бүхий албан тушаалтан шийтгэл оногдуулж шийдвэрлэсэн бол 3,614 буюу нэг хувийг шийтгэл оногдуулах, албадлагын арга хэмжээ авхуулах саналтай шүүхэд шилжүүлсэн байна.
Зөрчлийн хэргийн улмаас хүн, хуулийн этгээд, төр, нийтийн ашиг сонирхолд 3.8 тэрбум төгрөгийн хохирол учирснаас 2.3 тэрбум төгрөг нөхөн төлөгджээ.
Тавдугаар сард гарсан зөрчлийг дөрөвдүгээр сартай харьцуулахад:
- Согтууруулах ундааны эргэлтэд хяналт тавих, архидан согтуурахтай тэмцэх тухай хууль зөрчих зөрчил 19 хувь
- Татварын хууль зөрчих зөрчил 11.1 хувь
- Замын хөдөлгөөний аюулгүй байдлын тухай хууль зөрчих зөрчил 10.1 хувь
- Мөрийтэй тоглоом тоглох зөрчил 4.7 дахин өссөн байна.
Харин танхайрах зөрчил 29.7 хувиар, Нийгмийн даатгалын тухай хууль зөрчих зөрчил 25 хувиар, Гэр бүлийн хүчирхийлэлтэй тэмцэх тухай хууль зөрчих зөрчил 22.4 хувиар, Нийтийн зориулалттай орон сууцны оршин суугчдын амгалан тайван байдлыг алдагдуулах зөрчил 8.3 хувиар, Олон нийтийн газарт зүй бусаар биеэ авч явах зөрчил 3.6 хувиар, Хулгайлах зөрчил 3.2 хувиар тус тус буурсныг Улсын Ерөнхий Прокурорын Газраас мэдээллээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
